Марий самырык театрын артистше Александр Купсольцевлан 6 январьыште 55 ий темын. Мыскараче кумылан да талантан актёр ты лӱмгечым шӱм-чонжо гоч колтымо 100 утла рольжо дене вашлиеш. Тудо илыш пуламырыште театр гыч икмыняр жапланат каен, но тора кундемыш пашаш коштмо але вес сомылым шуктымаш артист семын пеҥгыдемдалташ полшеныт гына.
Сымыстара
Актёрын чурийыштыже куптыр погынаш тӱҥалын, да шым ияш уныкан кочаш савырнен гынат, кызытат шӱм-чон дене самырык улмыжым шижеш, ондакысе семынак куштылго капше дене марла тавалтен колта, йомаклаште оҥай деч оҥай персонаж-влакым келыштара.
Южгунамже А.Купсольцев янлыкым але иктаж образым ончыкташ сценыш лектеш веле, залыште шинчыше-влак тудын сымыстарыше чурийжым ужын воштылынат колтат.
Теве З.Долгован «Лаюкай агур» спектакльыштыже (2022) Монча кугызам сылнын келыштарен ыле, «Немыч ватыште» (2015) – Маклайым. «Сӧсна поминка деч вара» спектакльыште тудо – Врач, а «Торешватесолаште томашаште» – Тимка.
Но тачысе артист изиж годым моткочак вожылшо лийын. Ялысе клубышто куштымыж годым ваштарешла куштен толшо ӱдыр-влак ӱмбакат, залышкат ончалаш лӱдын, вуйжым кумык чыкен да кузе куштен пытараш шонен. Варажым И.С.Палантай лӱмеш музыкальный училищыште (лач тыште икымше актёр-влакын наборышт лийын) тунеммыж годым Ленин лӱмеш тӱвыра пӧрт пелен режиссёр Валерий Свистуновын чумырымо «Кумыл» ансамбльышке коштын. Туштат эше вожылмо койышыж деч утлен кертын огыл.
– А ӱдыржым кузе налынат? – йодде шым чыте.
Туддеч тыгайрак вашмутым кольым:
– Надя пелашем дене 1991 ийыште палыме лийынна. Тиде оҥай историй. Марий самырык театрыште пырля пашам ыштыме йолташем Валерий Степанов икана каласыш: «Чодыра сем» ансамбльыште куштышо ик мотор ӱдыр уло. Таче тудым путлаш (йӱкташ) каем, айда пырля». Мый келшенам. Ӱдыр мыланем келшен шинчын, сандене шкаланем путленам. Ме туддене ондакак иктаж концертыште вашлийын кертынна, коктын кок ансамбльыште куштенна, но илышыште тыге пӱралтын улмаш.
Тунам Надя «Труженица» фабрикыште ургызылан пашам ыштен. 1991 ий ноябрьыште палыме лийынна, а сӱаным 14 февральыште ыштенна. Варажым пелашем официанткылан куд ий тыршен, кызыт – поварлан.
УМБАКЫЖЕ — «Кугарня» газетыште.