Поро кумылан Геннадий Викторович Пушкиным шочмо Морко район Памашсолаштыже веле огыл, уло Марий Эл мучко шукын палат. Шке пашам ӱшанлын, йӧратен шуктымыж дене Медведево район Руш Кукмарий ялыште утларак чапланен. Вет тудо 1977 ийыште «Суртовский» совхозыш пашаш толын да эрелан тышан лакемын.
Г.Пушкин ончыч Морко кундемыште кандашияш Ярамарий школышто тунемын, варажым шинчымашым Канторъялысе школышто поген. Районысо Зеленогорский лесничествыште 8 ий ыштен. Ӱмыржӧ мучко – шофёр пашаште, Медведево больницыште «вашке полыш» машина денат кудалыштын. А 2005 ий годсек Руш Кукмарий школышто автобусым виктара. Тунемше, туныктышо-влакланат тудын дене куштылго: эре весела, ура чонан айдеме, школ коллективыштына илыш вийым ешарен моштышо. Ийготым ончыде, таче кечынат Геннадий Викторович шке пашажым куштылгын, моштен да устан виктарен шога. Машинам эре эскера, кӱлеш годым ачала, тӱжвалнат, кӧргыштат арулыкым куча. Кажне эрдене тора ялла гыч йоча-влакым поген, школыш тунемаш конда, кастене мӧҥгӧ ужатен колта.
18 ноябрьыште Геннадий Викторович 70 ияш лӱмгечыжым палемдыш. Уло школ коллектив тудым чапле пайремже дене шокшын
саламла да Морко районысо гӱжлышӧ кугу чодыраште кушкын шогалше тумо гай пеҥгыде тазалыкым, капкыл куштылгылыкым, кидйол лывыргылыкым да ласка шоҥгылыкым тылана. Умбакыжат тиде коллектив дене келшен, ваш умылен пашам ышташ порын сугыньлена.
Яна ПУШКИНА, МарГУ-н студенткыже:
– Ик эн поро, йӧратыме, пагалыме кочана Геннадий Викторович Пушкин – пеш поро, пашалан эре ямде айдеме. Школышто тунеммем годым мый коча дене пырля эрдене школыш коштынам, тудо мыйым тӱрлӧ верышке экскурсий дене коштыктен. Мыйын эн сай йоча пагыт лийын! Кочам нелылык годым мылам эре полыш кидым шуялта. Мый тудым йӧратем. Тудын дене ме моткоч кугешнена! Шочмо кечет дене, кочана! Тек тыйын шӱм-чонет эре самырык, ӱмырет кужу-кужу лиеш. Таза лий, нигунамат ит черлане, ит шоҥгем!
Медведево район Руш Кукмарий
школ коллектив лӱм дене
Светлана БЕЛОВА.