19-25 январь – Калорийым шотлымо дене палдарыме арня
Калорийым шотлымаш – кочкышышто мыняр энергий улмым шотыш налмаш. Кочкышын калорийностьшо тушто белок, коя да углевод мыняр улмо деч шога. Организмлан сайын пашам ышташ калорийым шотлен лукмо годым айдемын ийготшым, кап кӱкшытшӧ ден нелытшым шотыш налыт.
Калорийым шотлымо шотышто икмыняр темлымашым Калык тазалык да медпрофилактике рӱдерым вуйлатышын алмаштышыже Наталья Блошенко пуа.
– Калорийым чын шотлаш тунемза. Организмлан кушкашыже да вияҥашыже белок, коя да углевод кӱлыт. Белок чогашылым вияҥдаш да клетке-влаклан кушкашышт полша. Кочкышышто витамин-влакым шулыктараш, вуйдорыклан, тыгак гормональный, лимфатический да моло системылан пашам шот дене ышташ коя полша. Углеводым организмын вий-куатшылан шотлыман, углевод деч посна пашам ышташ, тунемаш, спорт дене заниматлаш ок лий.
– Шкаланда келшыше кочкыш наборым палемдыза. Тиде чӱчкыдын ямдылыме сий-влак. Нунын калорийностьыштым шотлен лукса да кочкыш дневникыш возыза.
– Пӱкш ден нӧшмӧ-влакым шагалрак кочса. Тиде пайдале кочкышлан шотлалтеш гынат, кочмо деч ончыч висашат уто огыл.
– Мом йӱмым шотыш налза. Эн шагал калориян йӱыш – вӱд. Кофем, шем але ужар чайым мыняр йӱмым шекланыман. Шере газировко-влакым гын йӧршеш йӱмым чарныман.
– Калорийым шотлаш – приложений-влак. Тыгай приложенийлаш могай кочкышым да мынярым кочмым возаш гын, организмыш логалше калорийым тыманмеш шотлен луктеш.