Тыге маналтын Шӱргыял школыштына шукерте огыл эртаралтше таҥасымаш.
5-9-ше класслаште тунемшына-шамыч «Рвезе тукым» йоча ушемыште улыт. Кажне класс посна отрядлан шотлалтеш. А тунемме идалык покшелне, январьыште, ме Елена Валериановна Григорьева дене коктын нине отряд-влак коклаште «Мыйын отрядем – мыйын сеҥымашем» таҥасымашым эртарен шогена. Тудо чылт пайрем семын эрта да кочай-ковай-влакын йӱлаштым арален кодаш полша.
Пайрем тӱҥалтышыште ме чыланат кажне ийын «РДШ» куштымашым эртарена. Тиде куштымашыш чыла ӱдыр-шамыч ушнат. А вара отряд-влакын командирышт, барабанщикышт, редколлегийышт да изирак вожатыйышт ӱчашат. Кажныже шке чолгалыкшым ончыктышаш.
«Мыйын отрядем – мыйын сеҥымашем» таҥасымашым Стелла Кузнецова ден Ирина Уразаева вӱденыт. Нуно «Рвезе тукым» йоча ушемнан эн уста тунемшыштлан шотлалтыт. А отряд-шамычын писылыкыштым жюри Вячеслав Александрович Николаев ончен да верым пуэн.
Таҥасыше-влаклан РДШ йоча толкынын историйже почеш вожатыйна Елена Валериановна викториным эртарен. Ончышо-влаклан туштым туштен, а туштылан чын вашмутым ойлышо йочалан пӧлек шотеш «Ямде лий» газетым кучыктен. Тыге жюрин иктешлымашыже почеш сеҥышышке «Кечыйол» отряд лектын. 2-шо вер дене «Пеледыш» отряд палемдалтын. 3-шо верым «Ал парус» отряд налын. 4-ше вер «Неугомон» отрядлан кодын.
Таҥасымаш пеш чаплын эртен. Йоча-шамыч чотак чолга лийыныт.
Дмитрий Егоров, Шӱргыял школысо «Рвезе тукым» йоча ушемын дружине председательже.
Снимкыште: «Мыйын отрядем – мыйын сеҥымашем» таҥасымаш годым.
