Апрель мучаште Иммунизаций шотышто тӱнямбал арня эртаралтеш. Тидлан келшышын, Марий Эл Республикысе Тазалык аралтыш министерстве, Кыдалаш медпашаеҥ-влакын ассоциацийышт да Йошкар-Оласе йоча эмлымвер эн сай фотозоно конкурсым увертареныт. Республикысе медорганизаций-влакын йоча подразделенийлаштыже «Я привит» акцийын участникше ден кумылан-влаклан лӱмын ямдылыме фотозонышто фотосъёмкым эртарат. Тидыже йоча-влаклан вакцинацийым эртарымын кӱлешлыкше дене палдараш полша.
Пытартыш 50 ийыште вакцинацийлан кӧра 154 млн наре еҥ илыше кодын. Вакциным ыштыктымылан кӧра шукырак аза илыше кодеш. Ырлыган деч вакцине, мутлан, 60 процент наре йочан илышыжым аралаш полшен.
Шанчыеҥ ден медпашаеҥ-влакын, правительствын, мер организаций-шамычын пырля пашам ыштымышт сай лектышым пуа: тӱнямбалне шедырам (натуральная оспа) пытарыме да полиомиелит деч утлымо, манаш лиеш. Тазалык аралтышын тӱнямбал историйышкыже кугу вашталтыш жап толын: черым вакцинаций йӧн дене сеҥаш лийме шотышто лӱдыкшыдымылыклан чарак ышталтын. Садлан вакцинацийын кӱлешлыкше нерген калыклан палдарыманак.
Тений Иммунизаций шотышто тӱнямбал арня «Добиться иммунизации для всех – в наших силах» лозунг дене эртаралтеш.
freepik сайт гыч налме фото.