Марий самырык тукым слёт латкумшо гана кумда Россий элнан чолга марий ӱдыр-рвезыже-влакым чумырыш. Форум тиде гана Оршанке районышто Кӧрдӧ ялысе каныме базыште лие. Тушко мыят миенам!
Слёт Удмуртий, Татарстан, Киров кундемла ден Марий Элым ушен. 18-35 ияш уста еҥ-влак погыненыт. Кӧ нуно улыт? Студент да пашам ыштыше, шкем кычалше да шонен пыштымыш ӱшанлын ошкылшо, мурызо, гармоньчо, артист, клуб пашаеҥ, журналист, сӱретче, туныктышо да молат.
Погынышо-влак кокласе икымше «келшымаш сескем» – Марий самырык тукым слётым
почмо кас. Тыште тӱрлӧ регион гыч толшо-влак шке кундемышт дене калык модыш, мурымаш-куштымаш гоч палдарышт. Ӧрат веле, могай ме тӱрлӧ улына!
Йыр шогалын, ваче-ваче ӧндалалтын, марий мурым мурымо мом шога! А гармонь почеш самырык-влакын кушталтымышт… Ууух!
ПРОЕКТЫМ ВОЗЕН МОШТЕНА
Тенийысе форум тыгай девиз дене эртыш. Кугу тӱткышым проект пашалан ойырымо. Ти-
дын нерген, слёт эртымеке, Алёна Иванова (организатор) интернетысе ик соцкылыште тыге возен: «Кум кечылан кум тÿҥ йодышым: проблемым, задачым да лектышым – лончылымо. «Эр вий» ушемын председательже Маргарита Маланова тÿрлö аланыш-
те тургыжландарыше йодыш-влакым рашемдаш полшен. Кусарыше, культуролог да литературовед, икмыняр проектын авторжо Ирина Садовина задаче-влакым шындаш туныктен. Спорт, туризм да молодёжный политике министерствын самырык-влак дене пашам ыштыме шотышто пöлкам вуйлатыше Сергей Анисов тичмаш проект могай лийшаш умылтарен».
Марий Элыште проект-влакым возышо да нуным илышыш сайын шыҥдарен колтышо уна-влак дене баркемп да мастер-класс формат дене эртыше вашлиймаш-влак самырык-влаклан моткоч келшеныт. Мемнан деке М.Шкетан лӱмеш драмтеатрын артистше Акпарс Иванов, «Интеллектуал» рӱдерым вуйлатыше Эльвира Куклина, Йошкар-Олаште арт-проектым вӱден шогышо самырык-влак ушненыт. Марий слётыш толшо участник-влакланат шке мер пашашт нерген каласкалаш йӧн лийын. Мутлан, Татарстан гыч Анастасия Ишманова «Инстамарийки» марафоным эртарымыж нерген ойлыш.
НЫЛ СТУДИЙ
Слёт кайыме жапыште ешартыш шинчымашым тӱрлӧ студийыште погаш йӧн лийын. Тиде шкешотан «клуб-влак». Самырык-влак слётын икымше кечыштыжак шкаланышт келшыше ик студийым ойырен налыныт да кум кече почела тушко коштыныт. «Марий краевед» студийым журналист да мер пашаеҥ В.Мочаев вӱден.
Нуно еш пушеҥгым, ял лӱмым шымленыт. «Марий квиз» студийыште Т.Евсеев лӱмеш Национальный тоштерын пашаеҥже Н.Васканова марий еш нерген каласкален, квизым эртарен (шкешотан викторине, йодыштмаш), и н т е л л е к т у а л ь н ы й модыш-влакым ышташ туныктен. «Марий йӱкыштӧ» марий лингвист, МарНИИЯЛИ-н пашаеҥже А.Чемышев йӱкым возымо шотышто сай шинчымашым пуэн. «МарикоMIX» сту-
дийыште комикс дене палыме лийыныт, марий комиксым ышташ тыршеныт. Ты студий-
ым вӱдаш мыланем пиал шыргыжалын.
ШКЕТАНЫН МЛАНДЫЖЕ
Слёт жапыште Оршанке районын ойыртемалтше вершӧржым ужын-коштмо, кундемын палыме еҥже-влак дене вашлийме. М.Шкетанын пӧрт-тоштерышкыже да кидмастар Вита-
лий Кудрявцевын пӧртышкыжӧ пурымо, ятыр мурын авторжо-влак Е.Рыбакова ден Р.Кудрявцева дене вашлийме.
САМЫРЫК ПАГЫТ – МЕМНАН
Слётышто ятыр модыш лийын. Пушкыдо кубик дене модмаш, мутлан, ик эн чот ушеш
кодеш. Тиде чылалан у лийын: кок командылан шелалтын, ик шагат жапыште кубик-влак дене эстафетым эртарышна. Тидым ужаш кӱлын!
Медик-волонтёр-влакат унала тольыч, СПИД да донор нерген презентацийым ыштышт. Вашлиймаш йодыш-вашмут формат дене эртыш. Мутланымашыш чолган ушнышо-
влаклан пӧлекым кучыктышт.
ОГЫНА ЧЕВЕРЛАСЕ!
XIII Марий самырык тукым слётыш толшо ӱдыр-рвезе-влак икте-весе дене ӱмыр мучко кылым кучаш сӧрышт. Эмоцийлан ик эн поян кас семын – «Речкин Бэнд» группын концертше. Ик мурын премьерже слётыштак эртыш.
Пытартыш кечын, «йыргешке ӱстел» йыр погынен, форумын лектышыж нерген иктешлымашым ыштышна. Тыге ХІІІ Марий самырык тукым слёт шке пашажым мучашлыш.
Кызытсе илышыште проектым возен да арален моштымаш кугу верым налеш. Ятыр паша тӱрлӧгранд кӱшеш ышталтеш. Сандене нине вашлиймаш-влакын акыштым шӧртньӧ дене таҥастараш ок лий! Налме шинчымашыш шке вийлан ӱшанымым да чулымлыкым ешараш гын, кеч-могай шонымашым илышыш шыҥдараш лиеш.
Марий самырык тукым слёт кажне ийын Марий Элын тӱрлӧ районыштыжо эрта. Форум Юрино, Кужэҥер, Марий Турек районлаште эше лийын огыл.
Валентина СЕМЁНОВА.
Авторын да Иван Речкинын фотошт.