«Мый кылменам»

Ты историйым мыланем йоча годсо йолташ ӱдырем шукертак каласкален. Тудын лӱмжӧ дене возем. Ала иктаж каҥаш дене полшен кертыда?

Тунам ме пелашем дене ача-авамын суртыштышт иленна. Авам черле лийын, мый – мӱшкыран. Йочам шочын ыш шукто, авам ты тӱня гыч кайыш. Нылле кече деч ончыч икшывына шочо. Ик кечын ондакысе семынак пелашем дене залысе диваныш малаш шарышна. Йӱдым омсам тӱкалтыме йӱкеш помыжалтым, пырдыжысе электрон шагат пелйӱд эрталтымым шижтарыш. Омсам чӱчкыдын кыреныт, пуйто вес велне ала-могай азап лийын. Пелашемым ончальым – нимом шижде пич омо дене мала. Кӧ тушто коштеш, йочам огыт помыжалтаре гын йӧра манын, семынем шонкалем. Глазокыш ончем, нигӧм ом уж. Тыге эше минут чоло тушкак кончен шогышым, нимогай йӱк уке. Мӧҥгеш малаш возым.

Шинчам веле кумен шуктышым, уэш перкалыме йӱк шокташ тӱҥале. Адак глазокым ончалаш тарванышым. Туштыжо лампысе тул веле коеш, но омсам кырат. Шӱмем лектын вочшашла кыра. Йолем тӱҥын, нимом ом шиж, йӱкымат пуэн ом керт. Койкыш кузе миен вочмемат ом шарне. Омсам уэш талынрак да талынрак кырат. Тыгодым «Ӱдырем, поч. Мый кылменам» пылышемлан солна. Авамын йӱкшым палышым, тылеч вара утларак чытыраш тӱҥальым.

Икшывемым налын, чот ӧндальым да пелашем дене когыньнян коклашкына пыштышым. «Ӱдырем поч, ават улам, моткоч кылменам» манын шокта адак. Лӱдмем дене «Отче Наш» молитвам йӱкын лудым. Йӱк-йӱан тыпланыш, но пӧлемысе пырдыжым пуйто уло вий дене икмыняр гана мушкындышт. Чечас иктаж-мо сӱмырла шонем. Тылеч вара мален колтымемат ом шарне.

Илышыште тыге лийын кертеш манын ик ганат шоналтен омыл. Тиде авамым ик малыме тувыр дене веле тойымылан лийын дыр манын шонем. Тудым ака да кокаже-влак мушкын, чиктен пыштеныт. Илымыж годым авам колем гынат, тендам лӱдыкташ ом тӱҥал, манын сӧрен ыле. Садлан мый тудо йӱдым авам огыл, иктаж-могай осал вий коштын дыр шонем. Тудлан мый дечем мо кӱлын, умылен ом керт? Вет авамым тойымылан але 40 кечат эртен огыл.

Антонида П.

Кужэҥер район.