Криминал
Курыкмарий район гыч 45 ияш ӱдырамаш ик ешым оксалан ондален. 2020 ий августышто тудо чыган семын чиен, ик пошкудо ялышке каен. Тошто арверым налаш шонымаш дене пенсионер-влак деке унала пурен. «Чыган» суртозалан вигак еш каргыме нерген ойлаш пижын. Ӱдырамаш суртым эрыкташ шке полыш кидшым шуялтен. Тудо атышке вӱдым темаш да 40 кече шинчыкташ, кӱпчыкыш оксам пышташ темлен.
75 ияш пенсионер-влак «мастар» ӱдырамашлан 280 тӱжем теҥгем луктын кучыктеныт. Лач тынар шийвундым вес тӱняш каяш ямдылалтын, погеныт улмаш. Вашке ондалкалыше ӱдырамашын удам ыштымыже яндар вӱдыш лектын. Ты кечынак илалше-влак мошенник нерген полицийыш увертареныт. 45 ияш ӱдырамаш 12 гана судитлалтын улмаш. Кызыт тудын пашажым «Мошенничестве» статья дене судыш колтеныт.
—
Полиций пашаеҥ-влак Йошкар-Олаште илыше 32 ияш сутенёрын шуктен шогымо осал сомылжым петыреныт.
Куд ий ончыч пӧръеҥ интим сынан шолып пашам тӱҥалын. Тушко 34 ияш таҥжым да кум палыме ӱдырамашым полшаш ӱжын. Чыланат нуно самрык ӱдыр-влакым кычалын, пашаш кумылаҥденыт. Йӱд лыве-влаклан оролым да транспортым ситареныт. Колыштдымо-влакым лӱдыктылын, мыскылен, пашам ыштеныт.
Клиент-влакым Интернет йӧн дене чумыреныт. Интим вашлиймашым айлыме пачерлаште, сауналаште да унагудылаште эртареныт.
Полицейский-шамыч чыла сутернёрым кученыт, кычал савырненыт. Кызыт расследований кая. 32 ияш сутенерым моҥгыштӧ шинчыктат, а полшышо кум ӱдырамаш деч нигушко кайыдыме нерген подпискым налыныт.
—
Осал пашам ыштыше вич пӧръеҥ следствий деч Якутийыште шылын илен, а кызыт нуным Марий Элыште кычалыт. Преступник-влакым бизнесмен-шамычым вес тӱняш ужатымыштлан титакленыт. Нунын коклаште кугу авторитетан криминал уло.
—
17 майыште 55 ияш йӱшӧ пӧръеҥ мопед дене кудалшыла аварийыш логалын. ДТП эрдене 9 шагат жапыште лийын. Ельниково шочшыжо йӱшӧ лийын да права деч посна транспортыш шинчын улмаш. Тыге тудо велосипед дене керылтын да эмлымверыш логалын.
—
Йошкар-Олаште 17 майыште кастене Луначарский уремыште 78 ияш ӱдырамаш Peugeot машрутко орава йымаке логалын. Транспорт гыч лекмыж годым тудын вуйжо пӧрдаш тӱҥалын. камвозын. Жапыште толшо медик-влак эҥгекыш логалшым писын эмлымверыш наҥгаеныт.
—
Йошкар-Олаште илыше 23 ияш пӧръеҥ Медведево посёлкысо микрофинансовый организацийын офисышке чурийжым маске дене шылтен, товар дене пурен да 42 тӱжем теҥгем шолыштын. Самырык еҥ, офис пашаеҥ деч оксам кӱчен. Куд шагат гыч шолыштшым кученыт, но окса кодын огыл. Преступникын мутшо почеш, тудо 42 тӱжем теҥгем «йӱд лыве-влак» дене жапым эртарымылан пытарен шуктен. Кызыт рвезым лу ий эрык деч посна кодымаш вуча.
Валентина Семёнова.