2023 ий годсек МарГУ-што кыдалаш профессиональный образованийым пуышо специальность-влаклан тунемаш лиеш. Ик тыгай специальность – «Музыкальное искусство эстрады» ( Калык культур да тӱвыра кокласе кыл институт). Тудын кӱлешлыкше, тунемме программе нерген педагог Людмила Владимировна Микушкина дене мутланышна.
Мурызо-педагог
Каласен кодыман, Людмила Микушкинам шукынжо Соловьёва фамилий дене палат. Морко районысо Комсомольский посёлкын ӱдыржӧ студентше годым (тудо И.С.Палантай лӱмеш тӱвыра да сымыктыш колледжыште эстрадысе музыкальный искусство пӧлкаште, варажым МарГУ-што калык культур да тӱвыра кокласе кыл институтышто тунемын) кугу сценыште мурен, эсогыл «Ший памаш» фестивальыште I степенян лауреат лийын. Но чон йодмо почеш Людмила Владимировна туныктышо профессийым ойырен. Икшыве-влакым эстраде мурым мураш, йӱкым чын шындаш туныкта. Тыгодым шкежат мастарлыкшым эре нӧлта. Шке жапыштыже Озаҥ оласе тӱвыра институтышто эстрадысе музыкальный искусство специальностьым налын. Ятыр ий И.С.Палантай лӱмеш колледжыште пашам ыштен. Тиде жапыште шагал огыл «шӱдыр-влакым» чӱктен.
9-ше класс деч вара вучат
Марий кугыжаныш университетыш 9-ше класс деч вара кумшо ий тунемаш погат. Тидын нерген шукынжо, поснак районлаште, огыт пале.
– Эстраде музыкальный искусство специальностьлан марла мурен моштышо-влакым вучена. Икымше курсышто тунемше лу ӱдыр-рвезе кокла гыч ик студент веле марла мура. Мемнан дене тунемаш чыла йӧн ышталтын. Студент-влак у да чапле тӱшкагудышто илат. Стипендийымат шагал огыл налыт. Тыглай стипендийын кугытшо – 1800 теҥге, а отличник-влак 2770 теҥге стипендийым налын кертыт. Тылеч посна социальный стипендий да материальный полышат уло. Шушаш ийыште 15 бюджет вер ойыралтеш. Тунемаш пураш усталык номерым ончыктыман, педагог-влак йочан музык данныйжым тергат.
Туныктымо программына поян. Студент-влак общеобразовательный предмет-влакым, музык теорийым, актёр мастарлык, сценысе речь, сольфеджио дисциплине-влакым, йӱкым шындаш, ансамбльыште да шкет мураш тунемыт. Кокымшо курсышто эстраде да джаз мурымаш, куштымаш да сценысе движений, фортепиано да моло предмет-влак ешаралтыт, практике занятийла эртаралтыт. Кажне курсышто музыкальный предмет-влак шукемыт. Ӱдыр-рвезе-шамыч усталык коллектив, ансамбль дене пашам ышташ тунемыт, мюзиклым шке шындат да университетыште моло студент ден педагог ончылно ончыктат. Моло зритель-шамычат ужыт гын, путырак сай, шонена. Ончыкшым тыгай шонымашнам илышыш шыҥдарынена.
Спецпредмет-влакым мый да Динара Фидаилевна Винк вӱдена. Ольга Николаевна Яшмолкина да Надежда Николаевна Лукьянова музыкально-теоретический предмет-влакым эртарат. Тылеч посна Шкетан лӱмеш театрын артисткыже Марина Почтенева актёр мастарлык, сценысе речь занятий-влакым вӱда, – палдарыш Л.Микушкина.
Кугешнена!
– Мемнан студентна-влак чолга улыт. Университетысе, оласе, республикысе, эсогыл Российысе конкурслашкат эреак ушнат. Шукерте огыл «Ший памаш» фестивальыште тунемшына-влак мастарлыкыштым кӱкшын ончыктеныт. «Сирены» ансамбль да Дарья Картузова шке номинацийыштышт I степенян лауреат лийыныт. Нуно чылан кумшо курсын студентше улыт. Дарья марий эстрадыш корным пеҥгыдын тошка. Волжский район ӱдырын «У кече» мурыжо Марий Эл радиоштат йоҥга. А икымше курсын студенткына Мария Бердникова «Ший Памаш. Йоча-влак» конкурсышто тыгак I степенян лауреат лийын.
МарГУ Финн-угор университет-влакын ассоциацийышкыже пура. Ты ассоциацийын эртарыме чыла мероприятийышкыже Марий кугыжаныш университет кумылын ушна да чыла шотыштат вияҥаш тырша. СПО-м почмеке, МарГУ кӱкшытшым пеҥгыдемден веле. Ноябрьыште Сыктывкарыште «Смуглянка» регион-влак кокласе военно-патриотический муро конкурсын гала-концертше эртаралтын. Тушто Марий Элын чапшым эстрадысе музыкальный искусство специальностьлан кумшо курсышто тунемше-влак араленыт. «Сирены» ансамбль спецдиплом дене палемдалтын, а Наталья Васильева шкет мурымаште икымше верым налын. Наташа – виян йӱкан марий ӱдыр. Тудо школышто икмыше классыштак тунеммыж годым мый декем занятийыш коштын. Кажне сеҥымашыжым куанен да кугешнен ончем. Пеш уста. Наташа тылеч посна калык художественный усталык специальностьлан заочно тунемеш, – манеш Людмила Владимировна.
Эстрадысе музыкальный искусствылан шӱман, мураш йӧратыше ӱдыр-рвезе-влак 9-ше класс деч вара МарГУ-ш тунемаш пурен кертыт. Университетыште мартысе ик шуматкечын каникул годым почмо омсам эртаралтеш. Тушко толын, лекше йодыш-влакым рашемдаш лиеш. Л.Микушкина мо кӱлешым раш умылтара, йочан мастарлыкшымат ончалеш.
Яндар йӱкан Наташа кумылым савыра
Калык культур да тӱвыра кокласе кыл институтын ик эн уста студенткыже – «Музыкальное искусство эстрады» специальностьлан тунемше Наталья Васильева. Ӱдырын ача ден аваже Морко районын шочшыжо улыт. Сандене Наташа марла чын да арун мурен мошта.
– Мый тӱрлӧ заведенийлаште мурем, оласе, республикысе мероприятий, концертлаште мастарлыкем ончыктем. Автор, композитор-влак дене пашам ыштынем да мылам возымо мурыштым йоҥгалтарынем. Можыч иктаж-кунам шкежат мурым возаш кӱын шуам. Вокал занятийыш 8 ияшак кошташ тӱҥалынам. Мастарлыкем вияҥдаш Людмила Владимировна Микушкина полша. Шуко шинчымашым мыланем пуэн. Тыгай сай специалист дек логалаш пиал. Кажне вокалистлан тудын дене пашам ышташ темлем, – манеш Н.Васильева.
Л.Микушкинан колтымо фото-влак.