14-18 октябрьыште Сыктывкарыште «Впусти музыку» музыкальный проект лийын. Тушто Марий кугыжаныш университетын Калыкле тӱвыра да тӱвыра кокласе коммуникаций институтын студенткыже Наталья Васильева шке мастарлыкшым ончыктен. Проектыш элнан 19 регионжо гыч 50 участник ушнен.
Вич ияш годсек
Наталья Йошкар-Олаште шочын-кушкын. Йоча пагытше Морко кундемыште эртен. Н.Васильева изинек музык тӱняште ила. Вич ияшымак ача-аваже тудым Йошкар-Оласе йоча-влаклан усталык пӧртыш музык дене кружокыш кондыштареныт. Тыгак музыкальный школын эстрадный вокал классыштыже тунемын, Йошкар-Оласе И.Палантай лӱмеш тӱвыра да сымыктыш колледж пеленысе йоча сымыктыш школышто шинчымашыжым нӧлтен. Кызыт МарГУ-што кокымшо курсын музыкальный искусство, эстраде направлений почеш профессионал шинчымашым налеш.
– Музыкым утларак шымлаш манын, ты вузым ойыренам. Тушто мыйын туныктышем Людмила Владимировна Микушкина пашам ышта. Тудо шке пашажым сайын палыше, профессионал айдеме. А тыгай еҥ-влаклан кӧра шонымашке шуаш, шинчымашым пойдараш, ум пален налаш тыршыше лийме шуэш.
Вузын илышыштыже чолгалыкем да моштымашем ончыкташ тыршем. Шукыж годым тӱрлӧ музыкальный проектышке ушнем.
Мый шке сферыште улмемым шижам, тиде мыланем келша, садлан чылажымат чон вошт колтем, – палдарыш Наталья.
Тынар ий шуаралтмаште ӱдыр шкенжым сценыште чаткан кучаш тунемын. Тушто тудо ласкалыкым, вийым шижам, манеш.
Уста ешыште кушкын
Натальян ача ден аважат музыклан тале улыт. Ачаже синтезатор, гармонь, гитар дене сайын шокта. Ӱдыр фортепьяно дене семым мастарын луктеш. Тыгак тукым изаже – тӱрлӧ семӱзгарын сай йолташыже, манеш. Наталья организатор семынат шуаралтеш. Еҥ-влакын йодмышт почеш сӱаным да моло пайремым организоватла. Тыгак Я.Эшпай лӱмеш Марий филармонийыште артист-вокалистлан пашам ышта.
– Ончыкшым шке мурым возынем, но кызыт жапем моткоч чӱдӧ. Тунеммаштат, пашаштат вараш кодмо огеш шу. Илен-толын, ты сомыллан кӱын шуам, шонем, вет чылажат ончылно. А кызыт шинчымашым таптыман, мастарлыкым нӧлтыман, – манеш Наталья.
Кугу опытым налын
Ӱдыр деч музыкальный проект кузе эртыме нерген умылкалышым. Тудо тыгерак каласкалыш:
– Пеш оҥай да пайдале морприятий лийын. Тушто ме музыкальный сферыште тыршыше кугу специалист, эксперт-влак дене пашам ыштенна. Тидыже моткоч кугу опыт. Адакшым элнан тӱрлӧ регионжо гыч проектыш ушнышо моло уста еҥ-шамыч дене ик сценыште выступатлымаш моткоч шергакан. Нуно шке пашаштым сайын палыше, профессионал улыт. Вич кече жапыште, чынжымак, шукылан тунемынна. Ятыр мастер-класс, репетиций-влак эртаралтыныт. Тушко миен коштмем да тунеммем пашаште эреак кӱлеш лиеш.
Тунемаш шонышо еҥым пӱрымаш кид гыч ончыко вӱден наҥгая, маныт. А Натальян койышыжо чылт тыгай. Садлан ӱдырын ончыкылыкшо волгыдо да лектышан лиеш манын, ӱшан уло.
Н.Васильеван альбомжо гыч налме фото.