Рошто пайрем деч ончыч йӱдым еҥ-влак ожнысек мужедаш йӧратеныт. Мыят ӧрдыжеш кодын омыл: ончыкылык пелашем нерген пален налаш тӱрлӧ йӧным кучылтынам. Теве икмынярже.
Пугомыля дене. Кастене левашыш лекман да икмыняр пугомылям кидыш налман. Вара нуным шотлыман: комыля мужыран – марлан лектат, мужырдымо – лишыл жапыште сӱаным ит вучо. Тыгак пу артана гыч ик комылям шупшын луктын мужедаш лиеш. Пу укшан – ончыкылык пелашет вурседылше, сырыше лиеш, укш деч посна – поро, умылен моштышо.
Йӱлышӧ кагаз дене. Кагазеш йӧратыме еҥын лӱмжым возыман. Вара лаштыкым талиҥгаш пыштыман да йӱлалтыман. Кагаз йӱлен ок пыте гын, чон пелаш дене кылдалтше шонымашда шукталтеш.
«Пуш» дене. Тазыш вӱдым темыза. Таз тӱрыш изи кагаз лаштык-влакым пижыктыза. Кажныштыже шке шонымашдам возымо лийшаш. Грецкий пӱкш шӱмын пелышкыже сортам шындыза да ты «пушым» таз покшек вераҥдыза. Сорта тул могай кагаз лаштыкым йӱлалта – тушто возымо шонымаш шукталтеш.
Екатерина.
Морко район.
Интернет гыч налме фото.