Машан 12 ияш улмыж годым ялышкышт чыган кува толын. Тудо мужедше лийын. Верысе ӱдыр-шамыч, ончыкылык пелашыштын лӱмыштым пален налаш манын, киндым, шӧрым конденыт да кидкопаштым тудлан ончыктеныт.
«Пелашетын лӱмжӧ Николай, а фамилийже Петров лиеш, шарнен код», – пеҥгыдын каласен мужедше Машалан. Тидланже ӱдыр ялыштына тыгай лӱман рвезе уке манын да кидкопам «лудмо» годым тӱткырак лияш темлен. Тылеч вара чыган кува Рязань олаште илаш тӱҥалат манын. Тыге ойлымо денат Маша келшен огыл.
Икмыняр ий гыч Машан аваже ӱмыр лугыч лийын. Извате ава пелашыжын икымше ватыж деч йоча-шамычым пешыже йӧратен огыл. Садлан уто логарым мӧҥгыштӧ кучыман огыл, вес вере илаш колтыман манын. Паспортым налмеке, ӱдыр техникумыш тунемаш пурен. Шольыж ден шӱжаржым пырля наҥгаен. Но Рязаньыш огыл, а Москош. Ӱдыр тунемын, пашам ыштен. Вет тудлан эше кок еҥым йӱкташ да пукшаш кӱлын. Икмыняр ий Москошто илымеке, Рязаньысе керамический заводыш пашаш пураш темленыт. Тӱшкагудышто ик верым ойыреныт. Ик койкышто кумытын мален иленыт.
Тӱшкагудышто Маша Анатолий Петров дене палыме лийын. Николай огыл гынат, фамилийже чыган куван мужедмыж гаяк, шоналтен тунам… Рвезе ӱдырым сымыстараш тыршен. Ӱдыр ден рвезе сай, йӧратыше мужыр лийын кертыныт, но чылажымат ик случай кошартен. Анатолийлан кугу мероприятийыш каяш йолашым шымартыман улмаш. Тудо Машам полшаш йодын. Ӱдыр туге «чаплын» шымартен, рвезылан у йолашым налашыже логалын. Ты чапле йолашыж дене Анатолий Машан йолташ ӱдыржым марлан налын.
Ӱдыр пелен кок изи йоча илен. Тидыже опеке йодыш шотышто тургыжландарымашым луктын. Туге гынат Маша шольо-шӱжарже верч пеҥгыдын шоген. Тӱрлӧ вере полышым йодын коштмеке, тудлан у тӱшкагудышто пӧлемым пуэныт. Икшыве-влакым тичмаш ешыште кушташ, пелашан веле лияш кодын.
У илыме верыште адакат Петров фамилиян рвезе дене палыме лийын. Тольык лӱмжӧ – Виктор. А Викторын эше куд изаже улмаш, иктыже – Николай. Тудо, изаж деке, тӱшкагудыш толмек, Машам икымше гана ужын да вигак йӧратен шынден.
Чыган куван мужедмыж годым сӧрымӧ Николай Петров Рязань гын, чынжымак, Машан пелашыже лийын.
Нуно кандаш икшывым йолымбак шогалтеныт, 16 уныкан коча-кова улыт. Луымшыжо мый улам. Кована мыланна ты историйым шукертак каласкален. Мужедшын сӧрымӧ пелашем улат манын, южгунам, кызытат кочаланна ойла.
Юля Т.
Рязань ола.