Тунемше-влаклан шке семын иктаж сомылым шукташ але шымлаш проект паша полша. Тидымак пеҥгыдемдыш Йошкар-Оласе 19-ше №-ан школышто 29 апрельыште эртарыме республикысе «Корифеи» XI научно-практический конференций.
Тушко 74 йодмаш пурен. Йоча-влакын пашаштым куд секций почеш шеледыме. «Филологий» секцийыште аклыше эксперт радамыште кумшо гана лийым. Иктешлен каласем: кажне ийын тунемше-шамыч оҥай да ойыртемалтше паша-влакым кондат, кажныжым призовой верыш лукташ лиеш, йоча-шамычын шинчымашыштат келге. Сеҥышым ойырен налаш куштылго огыл ыле.
Иктышт писатель дене кылдалтше пашам шуктеныт: Н.Некрасовын шочмыжлан 200 ий темме лӱмеш лэпбукым ыштеныт, Л.Улицкаян произведенийлаж негызеш ӱдырамаш прозым лончыленыт, М.Лермонтовын математике дене кылдалтмыжым шымленыт. Весышт ковид ваштареш виктаралтше калыкмутын ойыртемжым кычалыныт, ковидный неологизм тӱняште пӧрдыныт. А кумшышт шымлыме паша дене пырля усталык сомылым шуктеныт.
Икымше верыш Йошкар-Оласе 19-ше №-ан школышто 8-ше классыште тунемше Мария Конакова ден Ксения Иванова «Русский язык в наклейках» пашашт дене лектыныт. Ӱдыр-влак руш йылмым тунеммаште кӱлешан наклейке-влакым ямдыленыт да печатлен луктыныт. 200 утла правиллан 250 наклейкым ыштеныт. Нуным 5-9-ше класслаште правил-влакым тунемме олмеш кучылташ путырак йӧнан лиеш.
Кокымшо верым ты школыштак 7-ше классыште тунемше Анастасия Якимова ден Дарья Истаковалан пуымо. Нуно 2022 ийлан литератур календарьым чумыреныт да савыктен луктыныт. Тушто идалыкысе юбиляр-влакым палдарыме, нунын нерген кӱчыкын возымо. Тыгак писатель-влакын произведенийыштлан пырля тунемше йолташыштын сӱретлыме сӱретыштым вераҥдыме.
Тыгаяк почётан кокымшо верым налме дене Т.В.Иштрикова лӱмеш «Синяя птица» гуманитарный гимназийыште 8-ше классыште тунемше Арина Наумовам саламлышна. Тудо ковид ваштареш виктаралтше калыкмутын структур ден семантике ойыртемжым лончылен.
Кумшо верышке У Торъялысе кыдалаш школын 6-шо классыштыже тунемше Вероника Рыбакова лектын. Ӱдыр шке классыштыже, районыштыжо фамилий-влакын этимологийыштым шымлен. Тудын палемдымыж почеш, У Торъял районышто кумдан шарлыше фамилийлан Домрачев ден Егошин шотлалтыт.
Медведево гимназий гыч ӱдыр-влакын пашаштымат кӱкшын аклаш лиеш. Анастасия Мимеева Медведево посёлкысо урем лӱм-влакым шымлен. Дарья Стяжкина подростко-влакын мутланымаштышт йот йылме гыч пурышо шомакым кучылтмым радамлен да сленг мутерым ыштен. Англичан йылме гыч руш йылмыш шыҥен пурымаш темым Йошкар-Оласе 19-ше №-ан школ гыч Мария Коршуноват авалтен. Ты школ гычак Артём Петров (5 класс) (СНИМКЫШТЕ) идалык жапым ончыктышо календарь-влакым ямдылен.
Т.И.Александрова лӱмеш 11-ше №-ан лицейын тунемшыже Полина Дружинина антиутопий манме жанрым лончылен.
Ӱдыр-рвезе-влак шке туныктышышт дене пырля кугу сомылым шуктат, йочам шонаш да тӱрлӧ пашалан кумылаҥдат. Тидыже, илен-толын, йоча-влаклан кугу проектым авалташышт корным почаш полша.
Эльвира Терентьева.
Авторын фотожо-влак.