Шернур район Мустай ялыште ФАП школ оралтыште верланен. Тудым фельдшер Гульнара Рафхатовна Зайнаитдинова 2008 ий годсек вуйлата.
Г.Зайнаитдинова Шернур посёлко гыч кажне кечын Мустайыш пашаш кудалыштеш. Киров область Советск оласе медколледжым тунем пытарен. Дипломым налмеке, Шернур посёлкысо поликлиникыште терапий отделенийыште пашам ыштен. Тыште вер лекмеке, фельдшер специальностьшо дене пашам ышташ темленыт.
ФАП Мустай йыр улшо 16 ялыште (Пактай, Лужалу, Кугу Шокшем, Изи Шокшем, Сакар почиҥга, Пыркын, Шӱрашэҥер, Пекул почиҥга, Аблан почиҥга да молат) илыше 840 наре еҥым обслуживатла.
Йоча-влакын тазалыкыштым медшӱжар Диана Аркадьевна Шабалина терген шога. Ты кундемыште 110 наре йоча шотлалтеш.
– ФАП-ш тӱрлӧ чер дене толыт. Тыглай чержым, ОРВИ гайым, шке эмлена. Пӱсӧ трахеит, бронхит годым рентгеныш, анализыш направленийым возен пуэна. Чер нелырак гын, райрӱдысӧ поликлиникыш колтена. Врачын темлымыж почеш тӱрлӧ процедурым, уколым, системым тыштак ыштена. Диспансеризацийым шкеак эртарена. Вӱрым налына, поликлиникыш наҥгаена. Ӱдырамаш-влакым ончена.
ФАП-ш тылзылан кок гана Шернур поликлинике гыч педиатр, терапевт толыт, приёмым эртарат. Икмыняр кече ончыч еҥ-влаклан тидын шотышто шижтарена, кӱлмӧ годым анализымат налын ямдылена. Тыглай кечын ФАП-ш кокла шот дене 10-13 еҥ толеш гын, педиатр, терапевт деке еҥ эре шуко, чылан тергалтнешт, – каласкала фельдшер Г.Зайнаитдинова.
Гульнара Рафхатовна кӱлмӧ годым черле-влак деке, машинашкыже шинчешат, вашке кудал мия. Эмымат Шернур гыч шке налын конда, поснак илалше-влаклан.
Ялыште ФАП да калык верч азапланыше тыгай медпашаеҥ-шамыч моткочак кӱлыт. Тунам еҥ-влакат тазарак лийыт.
Авторын фотожо.