Марий калыкын Шорыкйол пайремже ик арня шуйна. Тудын пытартыш кечыже лач теле каникул деч вара кугарнялан логале. Тиде кечын кугурак класслаште тунемше ӱдыр-рвезе-влак марий йылмым туныктышо Валентина Петровна Казанцеван вуйлатымыж почеш пеш сай мероприятийым эртарышт. Тӱрлӧ-тӱрлӧ вургеман, гармонь да тӱмыр дене васликува ден васликугыза-влак толын пурышт. Нуным озавате ден оза кугыза мелна кышыл, коҥгаш кудалтыме пареҥге, пӱкш, пура дене вашлийыч. Мӧчӧр-влак, сай сугыньым пуэн, тӱрлӧ модыш дене модыктышт. Кугурак ӱдыр-рвезе-влак, портышкемым кышкен, мешак гыч пугомылям луктеден, ончыкылык илышышт нергенат мужедын ончышт.
Валентина Петровна Шорыкйол дене кылдалтше калык пале-влак дене палдарыш, шийвундан лияш оксамат шотлыктыш. Меат, тӱҥалтыш классыште тунемше-влак, пайремыш тӱрлӧ оҥай вургемым чиен мийышна, шер теммешкак модна. Пайрем мурымаш-куштымаш дене мучашлалте.
Егор Медведев.
Шернур район Мустай.
