50 наре роль да оҥайын, ойыртемалтшын да шке семын эртыме корно. Лач тыге ойлаш лиеш Марий самырык театрын актрисыже Татьяна Попова нерген.
Усталыкым таптымаште
Коло ий утла жапыште Шернур район Кыдалсола (Лавраенер) ӱдыр марий драматургийыште, классический руш произведенийлаште да йомаклаште тӱрлӧ сынан образым ыштен, зрительым воштылаш таратен, южгунамже шортарен да чаманыктен. Икмыняр пашаштыже йыргыктен йогышо памашла йоҥгышо яндар йӱкшӧ дене спектакльлан ямым пурта. А могай койышым ончыктен мошта: я сай озавате, я йӧратен моштышо ӱдыр але ӱдырамаш. Тыгак икте-весым умылышо, шке пелашыжым вучышо, ойганыше шӱлыш дене авалтше… Чылажымат мастарын, кӱлеш семын калык ончыко луктын моштышо.
Ты актрисым сценыште эре ончымо гына шуэш. Тыгодым сӧрал чурийвылышан да йытыра капкылан улмыжымат палемдыде ок лий. Аристланак пӱралтын манам гынат, йоҥылыш ом лий.
Татьяна изиж годсек усталык корным тошкен, ятыр мероприятийыш, пайремыш ушнен. А вара илышыжым муро дене кылдаш шонен. Но лачак тудын тунем пытарыме ийлан Йошкар-Оласе тӱвыра да сымыктыш колледжыште тиде направлений лийын огыл. Сандене актёрлан тунемаш ямдылалтше-влакын группышкышт каен. Мурызо-шамыч деке кусаралтам манын, эше кок ий наре шонкален илен. Варажым актёрын пашаже шкеж деке савыралын, келгышке наҥгаен. Татьяналан тӱрлӧ койыш-шоктышым почын пуаш утыр келшен шинчын да шонымашыжым вашталтен: актёр муренат да тӱрлӧ образым сӧрастаренат кертеш.
Кызыт коклан «мураш профессионально тунемшаш ыле» шонымаш вуйышкыжо пура. Но чыла яра жапшым ешыжлан да суртшылан пӧлекла. Валера пелашыж дене Йошкар-Олаште ик пачашан пӧртым чоҥен шынденыт. Тушко куд ий ончыч илаш пуреныт. Кызыт мартеат тудым уэмден, сӧрастарен шогат. Сандене Татьяна ий еда отпуск жапшымат лачак тыште эртара.
Куд сотык мланде кумдыкышто еш тӱрлӧ сорт пеледышым кушта. Татьяна 12-13 тӱрлӧ петунийым, тынарак лилийым да ирисым, тюльпаным, роза пеледышым шынден. Тыгак изирак садыштышт вишне, олмапу, сливе, шемшоптыр кушкыт. Мончаш пурен, шашлыкым кӱктен да родо-тукымжо, йолташыже-влак дене погынен канаш йӧрата.
Икмыняр режиссёр дене
Татьяна Попова эре ик театрыштак тырша гынат, тӱрлӧ режиссёр дене пашам ыштен. Утларакшым – художественный вуйлатыше Олег Иркабаев дене. Тидын нерген Т.Попова тыге каласыш:
– Олег Геннадьевич дене уло кумылын пашам ыштена. Тудым кокымшо ачаланна шотлена. Шукерте огыл у режиссёр Станислав Голодницкий Марий самырык театрыш толын. Кызыт туддене пырля тӱрлӧ образым шочыктена.
Тыгак 2020 ийыште Моско гыч толшо режиссёр Дмитрий Королев шке шинчаончалтышыж дене «Зигзаги любви» спектакльым шындыш. Тушто мылам шӱдыр семын палыме кугу актрисын, Вероника Горностаеван рольжым, темлыш. Вара тудак «Эту дуру я любил» ден «Эти свободные бабочки» шкешотан постановкым ямдылыш. Туддене пашам ышташ путырак оҥай ыле.
Зинаида Долгова шке шындыме постановкылаштыже икмыняр рольым ӱшанен. Туддене пырля тыршымаште куштылгылыкым шижынам.
Режиссёр Эрвина Гордеева дене ыштыме ик эн кугу пашалан «Шкет кукун мурыжо» музыкальный драмым шотлем. Тушто артистке Луиза семын иктаж куд мурым муренам. Варажым ты пашам Олык Ипай лӱмеш молодёжный кугыжаныш премий дене палемдышт.
Мый куанем, кунам мылам мурыман роль-влакым пуат. А такшым чыла образымат чоным пыштен ончыкташ тыршем.
Пырля улына
Татьяна Попова Сергей Аксаковын «Аленький цветочек» йомакыштыже Настенькам модеш да иктаж шым мурым йоҥгалтара. Кодшо кеҥежым Пошкырт кундемыште театрын гастроль дене коштмыж годым «Сказка о рыбаке и рыбке» йомак ончыкталтын. Туштат ныжылге Русалкым келыштара.
Актрисе ятыр келге шонымашан героиньым мастарын чоҥен моштымыж дене ойыртемалтеш. Теве Александр Петровын «Ӱмыр пелаш» пьесыж почеш шындыме спектакльыште Ольган рольжым келыштарен, ойганыше да куаныше ӱдырамашым ончыктен. Ныл ий ончыч «Йошкар-Ола театральная» фестивальыште актрисе Светлана Никитина дене коктын ӱдырамашын пӱрымашыжым устан почын пуымылан спецприз дене палемдалтыныт.
– Марий самырык театр – мыйын ешем. Сандене, таче тудым коден, вес верыш кайыме огеш шу. Тыште поро йолташем-влак улыт. Теве кызыт актрисе Ольга Федотова дене Туфан Минуллинын «Ныл качылан – ик мыскара» комедийыште йолташ ӱдырым модына. Тудым калык сайын вашлиеш. Илышыштат ме Оля дене йолташ ӱдыр улына, пырля тунемынна, ик гримёркыш вераҥынна.
Кажне гана спектакль деч вара шкаланем иктешлымашым ыштем, кузерак модмемым мӧҥгышкем шонкален ошкылам. Кодшо гана тиде спектакль деч вара кумылем нӧлтшӧ ыле. Эсогыл тылеч вара ты рольым эше иктаж кок гана модын кертме вий-куат лектын.
Вес ӱшанле эҥертышемлан тукым изам Сергей Мамаевым шотлем. Тудо театрыш толмем годсекак эре ой-каҥаш дене полшен шога, – манеш Татьяна.
Театр шкеж деке тӱрлӧ семын калыкым иктеш чумырышаш. Вет актёр-влакым мотор вургем дене сценыште ужмо да вес семын койын моштымо чонышко ю шӱлышым пурта. А Марий самырык театрыш тӱҥ художниклан шке пашаж дене ойыртемалтше Борис Голодницкийым ӱжыныт.
– Южгунамже туге чучеш, пуйто ты уста еҥын ыштыме костюм-влакым чиет да от мошто гынат, модат. «Алиса в стране чудес» йомакыште кугыжа ватын рольжым (Белая королева маналтеш) ош мотор тувыр дене сценыш лектам. Тудыжо чинче-вунчо дене йылгыжеш. «Алые паруса» ден «Винил» мюзикл-шамычымат онченда гын, ужында: туштат моткоч мотор костюм-влак улыт, – ойла актрисе.
Татьяна пелашыж дене коктын кок йочам ончен куштат. Матвей спортлан шӱман гын, а Ксения аваж семын артист кумылан кушкеш. Тӱвыра да сымыктыш колледжын национальный гимназийыштыже фортепиано дене шокташ тунемеш. Теве «Валентин Колумб. Легенды милые, прощайте!» спектакльыште шкенжын туныктышыжо Эллина Архипован изирак годсо жапшым модеш да семӱзгар дене шокта. Тылеч посна республикыште ямдылыме кум кинофильмыште модын.
Фото-влакым Т.Попован альбомжо гыч налме.