«Кугарня» газетыште «Вӱд сер» мурым савыктенна. Тушто палемдыме почеш, Анатолий Куклинын семже манме. А тылеч ончыч ты мурылан семым Юрий Евдокимов-Тойварс возен.
«Тиде ачайнан, Александр Павлович Пчёлкинын, йӧратыме мурыжо. Тудым ме «Ах, гармонь» да еш пайремла годым эре мурена», – манеш поэтессе Татьяна Пчёлкина.
Мурымо видеоштым ончаш темлена — https://vk.com/video387549443_456239285
Мутшо Давлет Исламовын.
Яндар вӱд серыш лектын, тыйым вученам.
Толметым ошкылет гыч вигак паленам.
Вара эҥер воктене мужыр шӱм кырен.
Кукужо ик кастене ӱмырым сӧрен.
Куку сӧрен пиалым шӱм-чонлан.
Мардеж монден пуалмым коктын толмылан.
Коштна ме сер воктене, кидым ваш кучен.
Мемнан нерген ойленыт: «Мужыр кӧргӧрчен».
Но сусыр кайык гае кодым шкетынак.
Таҥемже мӱндырк кайыш кидым пудеак.
Вучем – огеш тол серыш, мондыш мо йӧршеш?
Коштам садак вӱд серыш, угыч вашлиймеш.