Весела кумылан, чатка самырык ӱдырамаш Ольга Элембаева дене эше шошым «А ну-ка, ӱдыр-влак!» республикысе конкурсышто палыме лийынам. Тудо шке усталыкше, койыш-шоктышыж дене кеч-кӧм савырен кертеш. Конкурсышто Ольга Шернур районын чапшым арален да «Эн тыматле» номинацийыште палемдалтын.
О.Элембаева «Шернур сырзавод» ЗАО-што сыроварлан пашам ышта. Мураш, марла кушташ йӧрата.
Коваже туныктен
О.Элембаева Шернур район Лоскутово ялыште ныл шочшан ешыште шочын-кушкын, Оля эн изиже, межнеч, лийын. Ача ден аваже верысе колхозышто пашам ыштеныт. Ачаже Кузьма Геннадьевич Васильев трактористлан ыштен, аваже Алевтина Тихоновна фермыште зоотехник лийын,
– Колхозышто ачам пашам ыштен шуктен кертын огыл гын, олмешыше Алёна акам тракторым виктарен. Изинек пашалан кожмак кушмо. Мемнан дене иктат сустыкланен огыл. Алексей изай йоча годсек техникылан шӱман, ондакак комбайн дене пашам ышташ тунемын. Ирина акам мӧҥгыштӧ чыла сомылым шуктен. Мый гына индийский киносо гай эре муренам да куштенам.
Мыйым утларакшым ачамын могырым Майя Афанасьевна ковам ончен. Тудо марий такмакым мураш туныктен. Ныл ияшак мураш тӱҥалынам. Ковам дене иктаж пошкудо деке каена да мый тушто мурым муралтем ыле. Артист образем тичмаш лийже манын, Нина кокам, ачамын акаже, ончылшовычым пӧлеклен ыле. Кызытат тудым аралем. – манеш Ольга.
Илышын тӱрлӧ шӧрынжӧ
Ольга йочаж годым спорт дене кылым кучен. Куштылго атлетике дене заниматлен.
– Физкультурым туныктышо лияшат шоненам. Но пӱрымаш вес векыла савыралын. Лоскутово школышто индеш классым тунем пытарымеке, Оршанке педколледжыш англичан йылмым туныктышо специальностьым налаш пуренам. Шернур посёлкысо 2-шо №-ан кыдалаш школышто пашам ыштенам да яра жапыште Марисоласе тӱвыра да каныме рӱдерыште ик ансамбльыш коштынам, – ойла уста ӱдырамаш. – Самырык годым шкемым тӱрлӧ аланыште тергыме, шуко вере лийме шуэш. Сандене мый Москош илаш кусненам. Тушто флористланат, кевытыште ужалыше-кассирланат пашам ыштенам. Тыгодым «Московский» тӱвыра пӧртыш мураш коштынам. Тушто марий мурымат йоҥгалтаренам.
Оля ик верыште шинчен ок керт. Тудо шуко ум палаш йӧратыше, шке вийжым тӱрлӧ шӧрыныштӧ тергыше самырык еҥ. Ольга манеш:
– Москошто илымем годым соцсетьлаште радиовӱдышӧ курсыш погымо нерген пален налынам. Тунам ик верыш 50 еҥ лийын. Онлайн-кастингым эртенам да арня гыч «Вышка» онлайн-радиош практикыш ӱжыныт. Паша деч вара радиош куржам ыле. Тиде – кугу опыт. Журналист паша шке виемлан ӱшанымашым пуэн.
Чон мӧҥгӧ шупшын
Москошто вич ий илымеке, Ольга шочмо кундемышкыже пӧртылеш да «Шернур сырзавод» ЗАО-ш экспедицийыш пашаш пура.
– Сырлан заказым погенам да тудым вес кундемлаш, олалаш колташ ямдыленам. Варажым технолог-влакын пашаштым ончен, шкежат сырым ышташ кумылаҥынам. Ынде вич ий сыровар улам. Мемнан сырзаводышто шуко тӱрлӧ тамле сырым, мутлан, «Марсенталь», «Российский император», «качотта», «халумис» да молымат – шолтена, – каласкала Ольга. – Кызыт ыштыме пашам чонемлан лишыл. Паша верышкем пурымо деч ончыч кӱлеш-оккӱл шонымашым ӧрдыжеш кодем. Пашаште рушла я марла, я татарла весела мурым веле мурем. Кумылым нӧлтышӧ мурым мурен, сыржат тамлырак лиеш.
«Шернур сырзаводын» пашаеҥже-влак чолга да писе улыт. Нуно тӱрлӧ конкурсыш кумылын ушнат, шке мастарлыкыштым ончыктат, вашла полшен шогат.
Кок шулдыржо чоҥешташ вийым пуа
Олян йӧратыме пагытше – кеҥеж. Лачак кеҥежым эргыже-влак дене пырля пӱртӱс лоҥгаште канаш поснак чот йӧрата. Пырля колым кучаш коштыт.
– Эргым-влак дене ялысе пӱя воктене чӱчкыдын канена. Тусо пӱртӱс моткоч мотор. Шӱшпык шӱшка, пӱяште йӱксӧ-влак ийыт, чарлаҥге ден колшыре колым пырля кучат. Кучымо эн кугу коем кидкопам деч кугурак, а мыйын кидкопам патырын гай, карп лийын, – ойла О.Элембаева.
Олян кугурак Ярослав эргыже кудымшо классым тунем пытарен, изиракше Сергей – нылымше классым. Спортым йӧратат. Ава нунылан полшаш эре тырша. «Колоем-влак мылам вийым пуышо кок шулдырем улыт», – манеш уста ӱдырамаш. 
Ольган илыш девизше тыгай: «Кӱшкӧ чоҥештет гын, камвозашат ямде лийман». Сандлан тудо илышлан куанен, кеч-могай нелылыкым пеҥгыдын вашлийын мошта.
Еш альбом гыч налме фото-влак.