Пошкырт кундем Мишкан район Монар ялыште илыше да тысе школышто 10-шо классыште тунемше Сандра Шамаеван лӱмжӧ мыланем «Яндар йӱк-2020» конкурс деч вара палыме лие. Кодшо ийын финн-угор калык-влакын муро конкурсышт дистанционно эртаралте.
Тиде оҥай лӱман ӱдыр мурызо лияш шона. Ачаже Андриян Борисович стройкышто пашам ышта, а аваже Наталья Александровна кевытыште ужалкала. Сандра мурымо ятыр таҥасымашыште участвоватлен. Ик эн кугу сеҥымашыжлан 2016 ийыште Мишкан районышто эртарыме «Волшебный микрофон» конкурсышто Гран-прим сеҥен налмыжым шотла. А тылеч ончычсо ийыште ты конкурсышто да «Яндар йӱк-2020» конкурсышто С.Шамаеван усталыкшым икымше степенян диплом дене акленыт.
«Мыланем тунемаш, мураш, кушташ, еҥ-влаклан полшаш келша, – ойла Сандра. – Могай нелылык гына илышыштем ынже вашлиялт, тудым сеҥен, ончыко кайыме шонымаш дене илем. Чыла годымат кӱшкӧ нӧлталташ вийым муман, тунам веле иктаж-могай сеҥымашыш шуат».
Ӱдырын йӧратыме предметше ятырак. Тудо руш да англичан йылмым куанен тунемеш. Тыгак историйым да обществознанийым пален налаш келша манеш.
Сандра лӱмым ачаже пуэн. Тудлан немыч поп-мурызо да 90-ше ийлаште Европышто кумдан палымыш савырныше Сандра Крету пеш келшен. Сандене ӱдыр шочмеке, ача ден ача ньогаштлан лач ты лӱмым пуэныт.
С.Шамаева яра жапышым тӱвыра дене кылден, вет сценыш лектын муралтыме да кушталтыме сомыл кумылжым путырак нӧлта. Тудо Монар тӱвыра пӧрт пеленысе «Ший памаш» ансамбльыш коштеш, тӱрлӧ вере выступатла.
СНИМКЫШТЕ: Сандра Шамаева шола гыч кокымшо.