Марий муро алан кажне ийын у мурызо-влак дене пойдаралтеш. Таче нунын радамыште – Волжский район Чодыраялеш шочын-кушшо, кызыт Йошкар-Олаште илыше Надежда Степанова. Паша корныжо ужалкалыме аланыште шуйнен гынат, чонжо эре мураш, сценыш лекташ ӱжын. Ӱмаште лекше «Шыже ӱдыр» мурыжо марий эстрадыш корным почын. Кызыт Н.Степанован репертуарыштыже кандаш муро уло.
Изинек – ава деч посна
Надеждалан пӱрымаш корныштыжо шуко неле-йӧсым чыташыже логалын гынат, илышыште эре ӱшан дене ончыко ошкылын. Изинек ава деч посна кодын. Ачаже вич йочам шкетын ончен куштен.
– Аванан илышыже пеш ондак кӱрылтын. Тунам мый индеш ияш лийынам, 3-шо классыш коштынам. Вара мыйым да шольымым интернатыш наҥгайынешт ыле, но ачай, кугурак ака ден изам тидым ышташ пуэн огытыл. Ава деч посна пеш нелын кушкынна. Кызыт шарналтем, да шинчавӱдемат толеш, – шомакшым тӱҥале Н.Степанова.
Мурызо лийнеже улмаш…
Надежда вич ияшак мураш тӱҥалын. Кугу Корамас школышто тунеммыж годым тудо яндар, виян йӱкшӧ дене поснак ойыртемалтын. Школысо концертлаште, хорышто мурен, тӱвыра пӧртышкӧ коштын. Илыш корныжым тӱвыра паша дене кылдаш шонен, 8-ше класс деч вара Йошкар-Оласе культпросветучилищыш вокальный отделенийыш (кызыт –И.С.Палантай лӱмеш тӱвыра да сымыктыш колледж) тунемаш пурен, но мӧҥгеш пӧртылын.
– Тушко йолташ ӱдырем Людмила Лузина дене миен коштынна. Шыжым тунемаш толшаш улам ыле. Но Кугу Корамас школышто класс вуйлатышем Василий Петрович Яндыганов каяш чарыш. 10-шо класс деч вара тушко пурет, мане. Тудо жапыште ачамынат тазалыкше лунчырген ыле. Ешыште кугурак шотеш мый гына кодынам, сурт кокласе сомылкам шукташ кӱлын.
Школым тунем пытарымеке, ачанан ӱмыржӧ кӱрылтӧ. Тунам илышончалтышем весемын, нелылык ден орлык койыш-шоктышем таптеныт. Школ деч вара тунемаш огыл, а пашаш каенам, – мане Надежда Степанова.
Тунам ӱдырлан илен лекташ, кочкышым, вургемым налаш окса кӱлын. Йошкар-Оласе «Электроавтоматике» заводышто кок ий пашам ыштен. Варажым пӱрымаш тудым Киров кундем Яраҥ районыш наҥгаен.
Уэш – Марий Элыш
Киров кундемыште ятыр ий илымеке, 2002 ийыште Н.Степанова шочмо кундемышкыже пӧртылын. Пезмучаш ялысе кевытыште ужалаш тӱҥалын. Тушто Надежда ончыкылык пелашыжым, Эдуардым, вашлийын. Тудо Корамас кундемысе «Москва» колхозышто механизаторлан тыршен. Тыге кок йӧратыше еҥ ушнен, Чодыраялыште пӧртым нӧлташ тӱҥалын. Вате-марий икте-весым йӧратен, пагален иленыт, шочшым ончен куштеныт, ончыкылык нерген шонкаленыт. Но куд ий эртымеке, Эдуард пелашыжын ӱмыржӧ трукышто кӱрылтын. Ты орлыкым сеҥен лекташ шуко чытыш кӱлын. Надежда Николаевна чон вургыж, шинчавӱд дене мушкылт, ӱшаным йомдарен илен. Тиде жапыште шуко почеламутым возаш тӱҥалын. Варажым муро чонжым лыпландарен.