1 октябрьыште Йошкар-Оласе Чарла кремльыште Марий автономийым ыштымылан 100 ий темме да Пеледыш пайремым икымше гана эртарымылан ик курым темме лӱмеш фольклор пайрем эртаралтын.
Республикысе тӱвыра, печать да калык-влакын пашашт шотышто министр К.Иванов поэт Г.Сабанцевлан Марий Эллан 100 ий теммылан пӧлеклалтше медальым кучыкта.
«Кудо-Подворье», «Шокталте гармонетым», «Эх, марий вате», «Мастар кид» конкурс-влак онлайн йӧн дене лийыныт.
«Кудо-Подворье» конкурсыш Оршанке, Волжский, Кужэҥер, Шернур, Параньга, Морко, Марий Турек, У Торъял районла да Санкт-Петербург ола гыч 20 йодмаш пурен.
«Шокталте гармонетым» конкурсышто республикысе 11 район, Санкт-Петербург ола да Башкортостан Республик гыч 45 гармоньчо вийыштым тергеныт.
Марий Элысе 8 район да эше кум регион гыч кидмастар-влак «Мастар кид» лӱм верч таҥасеныт.
«Эх, марий вате» конкурсыш Марий Эл гыч 26 чолга ӱдырамаш ушнен.
Эр годсек Чарла кремльыште республикысе ялозанлык сатум ужаленыт, кидмастар-влак шке пашаштым темленыт.
Пайремым почмеке, «Эх, кушталтена мо вара!..» марий куштымаш мастер-классым хореограф, МарГУ-н туныктышыжо Нина Макарова эртарен.
Кечывал деч вара тӱрлӧ регионла гыч толшо коллектив-влак «Калык чон» концертым ончыктеныт. Тушко коло утла коллектив ушнен.
Тыгак «Марий Эл» мурышо да куштышо кугыжаныш ансамбль, марий артист-влак пайрем касым сӧрастареныт.
Кастене «Марий кас» гӱжлен.
Иван РЕЧКИНЫН фотожо.