Мурат, шоктат…

П.Тужилкин да В.Гельмар тунемшышт дене пырля.

Звенигово районысо Красногорский посёлкысо сымыктыш школышто кызыт 106 тунемше мастарлыкшым нӧлта, 10 туныктышо пашам ышта. Тушто «Фортепиано», «Калык семӱзгар-влак», «Хор мурымаш», «Хореографий»  пӧлка-влак улыт.

Тудо Красногорский посёлкысо 2-шо №-ан школ ваштареш верланен. Сымыктыш школ пелен эше усталык пӧрт пашам ышта. Икшыве-влаклан тушто тӱрлӧ кружокым, тыгак театрым чумырымо. Утларакшым тӱҥалтыш класслаште тунемше икшыве-влак коштыт. Нуно сӱретлаш, ненчаш да кидпашам ышташ тунемыт.

Сымыктыш школын эртыме корныжо йыжыҥан. Ондак тудын оралтыжат уда улмаш. Ятыр ий изи, тошто пу пӧртыштӧ верланен. Тушто туныкташ условийжат пешыже куандарен огыл гынат, туныктышо-влак шке пашаштым тыршен шуктеныт.

Школын ончычсо директоржо, кызыт гитарым шокташ туныктышо Пётр Александрович Тужилкин тачат эртыше пагытым чон коржын шарналта. Тудын тыршымыжлан кӧра сымыктыш школын пӱрымашыже рашемын, у зданийым сулен.

– Красногорский посёлкышто сымыктыш школым 1964 ийыште почмо. Икымше директорлан Михаил Тихонович Кузьминых пашам ыштен. Варажым мый 1989-1993 да 1996-2017 ийлаште школ директор лийынам. Звенигово районысо администрацийын ончычсо вуйлатышыже Пётр Владимирович Столяровлан кугу таум ойлем. Ончычсо тошто школын леведышыжым гына ышташ йодынам ыле. Тудо оралтыжге вашталтена мане. Тыге ме ондакысе поликлиникын оралтышкыже куснышна.

Туныктышо, ача-ава-влакын тыршымышт дене ачалыме пашам чолган ыштенна. Мыланна спонсор-влакат кугун полшеныт, кызытат полшат, тӱрлӧ семӱзгар дене чӱчкыдын пойдарат.

Мо кумылым волта: зданийыште моткоч йӱштӧ. Мыланна шокшо шагал пуалтеш, сандене телым кӱжгӧ вургемым чиен шинчена, – мане П.Тужилкин.

Ты нелылык гыч кунам-гынат утлена манын, туныктышо-влак ӱшанат.

Таче сымыктыш школышто актовый зал, хореографий ден гитар класс-влак улыт. Туныктышо-влакын опытышт кугу, талантан ӱдыр-рвезе-влакын мастарлыкышт мучашдыме. Йоча-влак районысо, регионысо, Российысе, тӱнямбалысе конкурслаште шке вийыштым чӱчкыдын тергат. Южо выпускник илыш корным тӱвыра илыш дене кылден, палыме еҥ марте кушкын. Шочмо школышкышт толын савырнат.

Красногорский посёлкышто шочын-кушшо Винера Мухаметовна Гельмар ты школышто ятыр ий пашам ышта. Тудо фортепианым шокташ, тыгак концертмейстерство пашалан туныкта.

– Йоча-влакым шым ияш гыч погаш тӱҥалына. Кок тӱрлӧ программе дене пашам ыштена. Нуным вич, тыгак кандаш ияш программыла дене туныктена. Школ деч вара икмыняр уста ӱдыр-рвезе Йошкар-Оласе Палантай лӱмеш тӱвыра да сымыктыш колледжыш тунемаш кая. Кодшо ийын ик ӱдыр тушко пурен гын, тений эше икмыняр тунемшым тушко ямдылена.

Пандемийлан кӧра пытартыш ийлаште конкурслаш эре онлайн ушненна. Тений ӱдыр-рвезе-влак Москош, тыгак Волжск олашке миен коштыныт, – мане тудо.

Красногорский посёлкышто йоча сымыктыш школын улмыжо куандара. Туныктышо-влак йоча-шамычлан усталык корныш шогалаш кугун полшат веле огыл, а негызым пуат. Тидыже ончыкылан пеш кӱлешан. Вет йоча-влак кокла гыч икмынярже садак ты корно дене илышыжым кылда.