Мураш-кушташ мастар

Диана Волкова изиж годсек мураш-кушташ йӧратен кушкын. Тидлан тудым аваж ден коваже кумылаҥденыт.

Коваже Светлана Аркадьевна кызытат Шернур районысо Тамшэҥер ялысе «Унавий» ансамбльыш да тыгаяк лӱман марий вургемым ургымо студийыш коштеш. А ӱдырлан чонлан лишыл пашам умбакыже шуяш коронавирус чер чаракым ыштен.

Диана Тамшэҥер ялеш шочын-кушкын. Ӱдырын шым ияшыж годым ешыже Лажъялыш илаш куснен. Икымше класс годсек Диана школысо «Калейдоскоп» кружокыш, клубыш кушташ коштын. Нуным мурен-кушташ Анжела Юрьевна Волкова туныктен. Ӱдыр-рвезе-влак шке номерышт дене ятыр пайремым сӧрастареныт.

7-ше классыште тунеммыж годым Д.Волкова баскетболлан шӱмаҥын. Районысо таҥасымашлашкат команде дене коштыныт. Тунеммаштат шеҥгелан кодын огыл, олимпиадылаште участвоватлен. Марий литератур дене республикыште кокымшо верыш лектын. Тыгак руш йылмым да литературым туныктышо Маргарита Арсентьевна Емелькина дене «Мастер и Маргарита» роман почеш сочиненийым возеныт да Республикыште 1-ше вер дене палемдалтыныт. Тыге Сочиш самырык лудшо-влакын «Сочи-МОСТ-2016» XV фестивальышкышт логалыныт.

Школ деч вара Д.Волкова Йошкар-Оласе строительный техникумышто юристлан тунем лектын. Кызыт МарГУ-што тӱҥалтыш класслам да информатикым туныктышо лияш ямдылалтеш. «Кузе туныктышо лияш шонымаш лектын?» йодмемлан Диана тыге вашештыш:

Изи годым школла модаш келшен, йоча-влакым йӧратем. Мыйын шонымаште, туныктышо – илышыште кӱлешан профессий. Кызыт ме мӧҥгыштӧ тунемына. Но тыгай йӧн мыланем ок келше. Профессийыштына практикылан шуко жап ойыралтшаш. Тыгак туныктышо дене шинчаваш ончен мутланымеке, материалат сайын шарналтын кодеш, – ойлыш студентке.

Яра жапыште Диана йолташыже-влак дене вашлияш, сӱретлаш, книгам лудаш йӧрата. Тыгак МарГУ-со «Мурсем» ансамбльышкат кошташ тӱҥалын улмаш, но пандемийлан кӧра тушто репетиций-влакым эртараш чареныт.

Ончыкыжым ӱдыр ансамбльын ешышкыже ушнаш шона. Тыгак фестиваль ден форумлаште вийжым тергаш кумылжо уло. Чер чакнымеке, студент-влак аудиторийлаште погынат, ансамбль-влакат шке пашаштым умбакыже шуят манын ӱшанена.