10 декабрьыште Марий тиште кечым М.Шкетан лӱмеш Марий драмтеатрыште кумдан палемдышна. «Кугарня» ден «Ямде лий» газет пашаеҥ-влак «Сылнымут кудо» площадкыште шке возымо почеламутышт дене палдарышт. Йошкар-Оласе медколледжыште тунемше Юлия Усова Христина Александрован почеламутшылан возымо шочмо вер нерген сылне мурым йоҥгалтарыш.
Юлия Советский район Кужмарий селаште шочын-кушкын. Ӱдырын изи улмыж годым еш Марий Турек посёлкыш илаш куснен. Верысе школышто кандашымше класс марте шинчымашым поген, вара Ургакш лицейыште биологий да химий направлений почеш идалык наре тунемын. Тений гыч Юлия Йошкар-Оласе медицине колледжын студенткыже. Ончыкылык илышыжым ты йыжыҥ денак кылдаш шона. Тудо изи годсек врач лияш шонен. Ешыште иктаж-кӧ черланен гын, ӱдыр чын медик гаяк черле-влак пелен эре тошкыштын: мазьым йыгаш, эмым кондаш полышкален. Ӱдыр тунеммылан кызыт ятыр жапым ойыра. Туге гынат чон йодмо сомылланат жапым муаш тырша. Юлия мураш моткоч йӧрата. Ӱдыр изинек усталык шӱлышан кушкын. Аваж дене пырля ансамбльыш коштын. Тушто тудлан тӱрлӧ сценкылаште изирак роль-влакым чоҥаш ӱшаненыт. Тыгак такмак-влак дене калыкым куандарен.
– Визымше классыш вончымеке, посёлкысо йоча-влаклан сымыктыш школышто шуаралташ тӱҥалынам. Тылеч посна «Заря» каныме рӱдерыште Ирина Николаевна Изыбаева дене мураш тунемынам. Тунам утларакше руш муро-влакым йоҥгалтаренам. Ик гана веле огыл мурымо конкурслаште моштымашем тергенам, – каласкалыш уста ӱдыр.
Ю.Усован икымше мурыжо «Шочмо вер». Ӱдырлан ты сомылым виктарен колташ самырык возкалыше Христина Александрова полшен. Тылеч вара репертуарыште «Туныктышо», «Иле куанен», «Шочмо кечыда дене» муро-влак погыненыт.
– Муро аланыште умбакыжат шуаралташ кумылем уло. Кызыт тунеммылан утларак жапым ойыраш тыршем, садлан сценышке шагалрак лектам. Шукерте огыл ик ялысе клубышто выступатленам, – мане тудо.
Кызыт ӱдыр, мутат уке, ончыкылык профессийым налме шотышто утларакше тургыжлана. Тидлан сайын тунемаш, тӱрлӧ олимпиадыште, конференцийыште шкенжым ончыкташ тырша. Тудын ойлымыж почеш, музык ден медицине коклаште шкешотан кыл уло. Иктыже весыжлан полшен шога. Мутлан, чоныш логалше муро-влакым колыштын, шонаш тунемат. Музыкотерапий организмлан ласкалыкым, куштылгылыкым ышта. Юлиян ончыкылыкшат музык гай ласка, куштылго да виян лиеш манын ӱшанена.
И.Речкинын фотожо.