Шернур посёлко гыч Злата Васильева дене ӱмаште «Ший памаш» финн-угор эстраде мурым мурымо регион-влак кокласе йоча фестиваль-конкурсышто палыме лийынна. Тунам ӱдыр «Шочмо мланде» муро дене выступатлен. Сценыште шкем кучен моштымыжо, порын шыргыжмыж дене тудо ончышо-шамычын кумылыштым савырен да шке ийготан-влак коклаште икымше вер дене палемдалтын.
Тыршен тунемше, активистке
Злата Шернур посёлкысо Н.А.Заболоцкий лӱмеш 2-шо №-ан школышто 9-ше классыште тунемеш. 11-ше классым кӱкшӧ отметке-влак дене пытарен, экзамен-шамычым сайын сдатлен, университетыш Тӱнямбал кыл факультетыш тунемаш пураш шонем, манеш. Ӱдыр тыршен тунемеш, тыгодым школышто эртаралтше ятыр мероприятийыш кумылын ушна, «Движение Первых» толкынын чолга еҥже.
Мураш – чон йодмо сомыл
– Мо шкем шарнем, эре мураш йӧратенам. Тидыже ачам деч куснен, шонем. Тудо муро тӱня дек лишылжак огыл (производствышто пашам ышта) гынат, йӱкшӧ пеш мотор, чон йодмо почеш мура. Авам – хореограф. Шӱжаремат мураш мастар, тудо мыйын семын сольно огыл, хорыш мураш коштеш, – палдара З.Васильева.
«Ший памаш» конкурсыш ушнаш Златам вокал дене туныктышыжо Светлана Николаевна Иванова таратен. Тылеч ончычат ӱдыр ты конкурсышто ик гана участвоватлен ыле. «Шочмо мланде» муро нелыжак огыл, но мотор, садлан конкурслан тиде композицийым ойырен налынна манын палемдыш ӱдыр.
Каласыман, Злата утларакшым рушла мутлана, туге гынат марий мурым чылт яндарын, акцент деч посна йоҥгалтарен.
– Марла умылем, вет мӧҥгыштына ача-авана шочмо йылме дене мутланат. Но йолташем-влак дене, школыштат рушла кутырем, садлан мурымем годым иктаж шомакым йоҥылыш ойлен колтем гын, авам мыйым тӧрлата. Такшым мураш мыланем – тиде чон йодмо сомыл. Тыге мый шке шижмашем почын пуэм, неле годымат мурем. Иктаж пашам ыштыме годымат шке семынем эре мурем, – манеш ӱдыр.
Мунчалтат, канат
Яра жапыште Злата тӱрлӧ сийым ямдыла. Тидлан аваж деч эре тунемеш. Ӱдырлан иктаж-могай тамле печеньым кӱкташ поснак келша. Шке ыштыме эн тутло кочкышыжо – чыве шылан фунчоза, ешыште чылан йӧратен кочкыт. Каныш кечылаште Златамыт ешге ковашт дек Аптулят ялыш кудалыт. Тушто пӱртӱс лоҥгаште канат, курык гыч мунчалтат, мончаш пурат.
Ончыкылан шонымаш, палемда Злата, тӱня мучко путешествоватлаш. Тидлан ӱдыр кызытак ямдылалтеш – англичан йылмым сайын тунемеш. Адакшым Злата еҥ-влак дене кылым вашке муын моштышо, весела кумылан, садлан тудын шонымашыже шукталтешак!
Авторын фотожо.