Йошкар-Ола. 27 апрель. «Марий патыр» конкурс. Сценыште шоҥго коча семын чиен лекше рвезе. Мыскараче койышан, чолга. Тыге ойлен пуа – воштылде от чыте. Чылт артистла кертеш. Ӱмыржӧ мучко сценыште лийын шоналтет, но уке. Тыгай кӱкшытан конкурсышко тудо икымше гана ушнен. Йоча жапше годым ны мураш, ны кушташ йӧратен огыл.
Тиде рвезе – Татарстан кундем гыч толшо Александр Гаврилов. Волжский район Пӧтъял ялын эргыже ынде кок ий Озаҥ олаште крановщиклан ышта. Туштак «Лай мардеж» фольклор ансамбльышке коштеш. Кок ий ончыч ты рвезе мураш тӱҥалын да сценыш Александр Чубайс лӱм дене лектын. Кӧ тудо тыгай?
Мураш-кушташ йӧратен огыл.
«Кызытсе жапыште мыскарче изиш лийын моштыман, уке гын илышыжат йокрокын чучеш. Школышто тунемме годым сценышке лекташ чот вожылам ыле. Но чонем дене тушто выступатлен ончаш кумыл эре лийын. Волжск оласе тӱвыра пӧрт усталык корнышко шогалтен. Тушто ик ий вӱдышылан пашам ыштенам: марий дискотекым, конкурсым эртаренам. Тыге шуко мурызо дене палыме лийынам. Лач ты пагытыште шкем мурызо семын терген ончаш шонымаш толын», – ойла самырык рвезе.
А вара калык ончыко лекташ псевдонимым кычалын. Тыге Чубайс лӱм лектын. Изиж годым йошкар ӱпшылан кӧра тыге лӱмденыт улмаш. Тачылан 4 мурыжо уло: «Чолга шӱдыр», «Куштымаш такмак-влак», «Ах, тылзе йӱд кавасе», «Пиалем». Лишыл жапыште рэп сынан эше ик мурым возаш шона. Рвезылан Олег Славин полша.
Паша корно рвезым Озаҥ олашке наҥгаен. Яра жапым Татарстан Республикысе Келшымаш пӧртыштӧ эртара. Тушто «Лай мардеж» фольклор ансамбльыш коштеш.
«Тыште шагал огыл йолташым вашлийынам. Келшымаш пӧртыштӧ шуко семӱзгар уло. Тушто тӱмыр дене перкалаш тунемынам», – ойла тудо.
Физрук лийшаш ыле…
Саша школ годсек спорт дене пеҥгыде кылым кучен. Писын куржталыштын, футбол, хоккей дене сайын модын. Жапыштыже Оршанке педколледжышке физруклан тунемаш пурен. Но ик ий гыч тунеммым кудалтен да армийышке каен. Тыге йоча годсо шонымаш шукталтде кодын. Туге гынат рвезе тачат спорт дене заниматла. Пӧтъялысе футбол командыште модеш.
Кӱшнӧ шинчем, торашке ужам!…
Армий деч вара Волжск оласе индустриально-технологический техникумын Пӧтъялысе филиалыштыже сварщиклан тунемын. Варажым вес профессийлан кумылаҥын: крановщик лияш шонен пыштен.
«2015 ийыште пашам кычалынам. Волжск оласе чоҥымо заводышко миен лектынам. Тушто крановщиклан тунемаш темлышт. Озаҥыште крановщик-влакым ямдылыме курсышто кум тылзе тунеммеке, уэш ты заводышко пӧртыльым. Ик ият пеле ыштымеке, ты пашам кудалтышым да шкем вес шӧрын гыч терген ончаш кумылаҥым. Тыге контракт почеш Самарышке миротворческий войскашке служитлаш кайышым. Икана Интернетыште уверым муым: Озаҥ оласе домостроительный комбинатыш крановщик кӱлеш. Содор тарванышым. Ты комбинат железобетон изделийым ямдыла. Мый нуным кран дене нӧлтем. Нине изделий-влак тӱрлӧ нелытан улыт, сандене шекланен пашам ыштыман. Мыйын шонымаште, крановщикын профессийже илышыште моткоч кӱлешан», – ойла А.Гаврилов.
Александр Гаврилов илышыште ум кычалаш, тӱрлӧ вере шке мастарлыкым нӧлташ да усталык корнышто волгыдо кышам кодаш тырша. Озаҥыште паша ситыше, туге гынат шочмо Пӧтъял кундемышкыже миен толде огеш чыте. Шочмо пӱртӱсын сӧраллыкше, ача-аван суртшо рвезылан сеҥымашке шуаш, илышыште ончылно лияш вий-куатым ешарат.
«Марий патыр» конкурс нерген 30 апрельыште лекше номерыште возымо ыле.