Тиде фотом Интернет гыч налме. Тушто йоча-влакын Кугече муно дене модмыштым ончыктымо.
Йоча жапышке пӧртылаш гын, мемнан ял воктене (Кугорнымбал Шале) чоҥгата пеш шуко. Садлан ме, йоча-влак, тушко эре погыненна. Кӧлан могай чоҥгата келшен, тушко чошен. Вара муным курык гыч пӧрдыктен колтен модынна. Но мемнан нимогай ӱчашымаш лийын огыл.
А таҥасен модмо годым еҥ муным налман улмаш. Муным пӧрдыктен волташ пу але картон дене волак гайым ыштеныт. Волак мучашеш тӱрлӧ кырча-марча тыгыде ӱзгарым оптеныт. Пӧрдыктен волтымеке, муно иктаж-могай ӱзгарым тӱка, тудо тыйын лиеш. А уке гын, муным налын от керт, тудо модмаштак кодеш.
Тиде модышым кӱварыштат эртареныт, ошмаштат, шудыштат модыныт. Кызытат тиде йӱла мондалтын огыл. Тыгак ожнысо семын икшыве-влак курык деке погынат, муным пӧрдыктен модыт.
Ме шкенан йӱланам шуктен шогена. А те?
Слава Смирнов.