манеш Марий самырык театрыште сӱретчылан пашам ыштыше Алексей Голубцев. Тудо кодшо ий ноябрьыште 50 ийым темен. Шочмо кечыжым пашаште вашлийын, ик районышто спектакльым ончыктымо годым пульт воктене шинчен.
Кодшо ийын, Марий тиште кечын, А.Голубцевым сценыш ӱжыч да «Служение народу» медальым кучыктышт. Тыгай кугу акым тудлан марий мультфильмлан сӱрет-влакым ямдылымыжлан пуэныт.
Шочмо Чывыж ялже
Кызыт Шернур район Чывыж ялыште шочмо суртшо пустаҥын шинча. Йочаж годымат тиде изи ялыште 14 пӧрт веле лийын. Но мыскара кумылан сӱретчын шарнымашыштыже тудо оҥайын сӱретлалтеш.
Ноябрьыште шочмыжлан кӧра Алексейым шке таҥашыж-влак дене пырля школыш налын огытыл. Сандене сентябрь-октябрьыште тудо пырля модын коштмо йолташыже-влаклан, тыгак пошкудыжо-влаклан школ гыч пӧртылмӧ жапыштлан альбом кагазеш икмыняр сӱретым сӱретлен да иктаж-мом возен ямдылен. Чыла тидым палисадникеш пижыктылын. Эртен кайыше еҥ-влак тудым онченыт, лудыныт да шыргыжал ошкылыныт. Тидлан Алёша моткоч куанен.
Кучанур тӱҥалтыш школышто тунеммыж годым рисований урокышто портфельым сӱретлаш ойленыт. Тидлан туныктышо «визытаным» шынден. Тылеч вара изи Алёша аваж деч кажне кечын альбомым налын пуаш йодын. Вет ик кечыште ик альбомым сӱретлен пытарен.
Нылымше классыште тунеммыж годым Йошкар-Оласе школ-интернат гыч туныктышо-влак толыныт да сӱретлен ончыкташ йодыныт. Пашаже келшен, сандене Алёшам школыш ӱжыныт. Варажым аваж дене пырля рӱдолаш толын, экзаменым кучен. Пурен кертме нерген серыш толмеке, кажне пӧртыштӧ илыше еҥ-влак палышт манын, ты серышым кучен, Алёша «Тунемаш налыныт!» манын кычкырен, уло ял мучко куржын эртен.
МУЛЬТФИЛЬМ-влакым кузе йӧратымыж нерген умбакыже 21 февральысе КУГАРНЯ газетыште лудса. Тидын нерген теве нине фото-влакат ойлат.
