Медведево районышто илыше 50 ияш ӱдырамашлан социальный фонд пашаеҥ лӱм дене йыҥгыртеныт да паша стажше шотышто йодышым рашемдаш МФЦ-ш «консультацийыш» возалташ темленыт. Черетыш возалтмым пеҥгыдемдаш смс дене толшо кодым каласаш кӱлын.
Вара ӱдырамашлан Роскомнадзор пашаеҥ лӱм дене йыҥгыртеныт да тылеч ончыч аферист-влак дене кутырен, ынде нуно Госуслуги порталысе личный кабинетышкыже пурен кертыныт манын увертареныт. Икмыняр жап гыч ӱдырамашлан силовой структур, вара Росфинмониторинг пашаеҥ-влак лӱм дене йыҥгыртеныт да тудын лӱмжӧ дене йотэлыш оксам колтымо манын увертареныт.
Тыге, лӱдын, ӱдырамаш йыҥгыртыше еҥын каласымыжым шуктен, банкомат гоч ик миллион наре теҥгем мошенник-влаклан «пӧлеклен», палдара Марий Элысе МВД.