Марий Эл Республик мучко 2020 ийын пел ийыштыже мототранспорт дене кылдалтше 28 корно туткар лийын. Тушто 21 еҥ эмганен, нунын коклаште – ийготыш шудымо куд йоча. Икте ДТП годым колен.
ПРАВА АЛЕ УДОСТОВЕРЕНИЙ КӰЛЕШ
Госавтоинспекцийын пашаеҥже-влак ушештарат: мопедым да скутерым виктараш «М» категориян права але изирак куат двигателян (150 куб.м марте) транспортым виктараш А1 удостоверений кӱлеш. Моло мотоциклым виктараш А категориян права лийшаш. Тыгай правам 16 ияш гыч пуат.
ПАССАЖИРЫМ НАҤГАЙЫМЕ ГОДЫМ
Мототранспорт дене пассажирым наҥгайыме годым поснак кугу тӱткышым ойырыман. Закон почеш А але А1 категорий праван, кок ий утла стажан водитель-влак вес еҥым шынден наҥгаен кертыт. Тыгодым шинчаш келыштарыме вер лийшаш. Адакшым шичше еҥат шлемым чийышаш. Но 12 ийыш шудымо йочам, каскыже уло гынат, шеҥгек шындаш огеш лий.
ЗАКОНЫМ ПУДЫРТЕТ ГЫН…
Водитель удостоверений деч посна мототранспортым виктарышылан административный правонарушений кодексын (КоАП) 12.7 статьяжын 1 пунктшо почеш 5000 гыч 15000 теҥге марте штрафым тӱлыктен кертыт. Тыгодым транспортым стоянкыш шогалтат, а кӧ ты мотоциклым правадыме еҥлан пуэн, РФ КоАП-ын 12.7 статьяжын 3 пунктшо почеш 30000 теҥге штрафым тӱлыктат.
Йӱшывуя виктарыше-влаклан КоАП-ын 12.8 статьяж почеш 30000 теҥге штрафым возен пуат да 18 тылзе гыч 24 тылзе марте правам поген налыт. Водительын праваже пеленже уке гын, 10-15 суткалан петырен шынден кертыт.
Кокымшо гана йӱшывуя виктарыме годым логалат гын, Уголовный кодексын 264.1 статьяж почеш паша должность гыч кораҥдат, 200-300 тӱжем теҥге штрафым тӱлыктат, тыгак 480 шагат пашам ыштыктат але кок ий марте эрык деч посна кодат.