19 октябрьыште Таллинн университетысе Терра галерейыште марий сӱретче Жанна Тохтын (ӱдыр фамилийже Ильина) «Мо нерген марий узор-влак ойлат?» лӱман ончер почылтын. Тудым Эстонийыште илыше-влак 28 ноябрь марте ужын кертыт.
Ончер
Тиде ончерым ямдылаш Морко район Шеҥше селан ӱдыржӧ Ж.Тохт тӱҥлан марий тӱрым налын. Кагазышке марий тӱр-влак йытыран возыныт. Автор тушто марий калыкын вургемысе тӱржӧ-влакым ончыктен. Тудын значенийжым умылаш манын, Жанна кидмастар И.Степанован «Марий тӱрыштӧ – Юмо-влак» книгажым кучылтын. Тылеч посна сӱретчын пашаже-влакым иктыш чумыраш да зритель марте намиен шукташ кӱлын. Тидлан туныктышо Маргот Каск, галерист Ева Кийлер, марий дизайнер Наталья Лилль шке надырыштым пыштеныт. А ончерым Родо-тукым калык-влакын кечыжлан Эстонийысе образований да научно шымлымаш министерствын, Таллинн университетын да Таллиннысе марий ушемын полшымышт дене чумырымо. Чылаштлан Жанна Тохт кугу таум каласа. Тыгай пашам тарватымаште «Тӱшкаште – вий» манме ой путырак келшен толеш.
Ончерым почмо кечын галерейыште погынышо калыклан пайрем гаяк чучын. Марий ӱдыр-влакын сылне марий мурым муралтымышт, Инга Погонинан скрипке дене сӧрал марий семым йоҥгалтарымыже ямым пуртеныт. Ты пайремын озажын пашажым ужаш толшо-влак мастар еҥлан тауштеныт, пеледыш аршашым кучыктеныт.
Сӱретче нерген
Жанна ынде шочмо мланде деч тораште 14 ий ила. Тышеч лу ийже Йыгева олаште эртен. Тунам тудын персональный выставкыже-влак Тартусо Литератур пӧртыштӧ, тӱрлӧ оласе книгагудылаште, гимназийыште да моло вереат эртаралтыныт. Автор тушто акварель да масло дене ыштыме радынаже-влакым ончыктен.
Тылеч посна ойыртемалтше картиныже-влакым еҥ-влак эстон але тӱнямбалысе сӱретчын пашаж дене пырля ужын кертыныт. Эстонийысе ола-влак деч посна (Паламуз, Нарва, Таллинн, Йыгева да молат) марий ӱдырын пашаже Санкт-Петербургыш икмыняр гана «толын коштын». Тыгак Финляндий, Индонезий, Италий, Литва, Мексика мартеат миен шуын.
Марий тӱр
Шукерте огыл Ж.Тохт шке шӱм-чонжым марий тӱр дене кылден. «Мӧҥгыштем изиэм годым салфеткыш марий тӱрым пышташ тӧченам. Варажым 5-ше классыш Йошкар-Оласе президент школын художественный классышкыже тунемаш каенам. Тушто мемнам тӱрлаш туныктышо Алла Алексеевна Орлова кумылаҥден. Тидлан арняште ик урок пӧлеклалтын. Тунам тӱрын значенийжым пешыже умылтарен огытыл. Марий Эл деч тораште илыме годым шукырак палаш тӱҥалынам, вет воктенем марий тӱрлан шӱмаҥше еҥ-влак улыт. Тыште дизайнер Наталья Лилль мастер-классым эртарен ыле. Ончерым ямдылыме годымат тудо консультантем лийын. Тӱрым шӱртӧ дене кагазыш тӱрленам», – каласкала Жанна Тохт.
ТИЧМАШ ТЕКСТЫМ «КУГАРНЯ» газетыште (2021 ий 19 ноябрь) ЛУДСА!