19 мартыште Йошкар-Олаште Самырык-влакын полатыштышт «Мисс МарГУ-2024» моторлык конкурс эртаралтеш. Тений тушто вузысо тӱрлӧ факультет да институт гыч 18 ӱдыр мастарлыкшым ончыкта. Нунын кокла гыч иктыже – Звенигово район Чакмарий селаште шочын-кушшо, МарГУ-што историй да филологий факультетыште икымше курсышто тунемше Дарья Иванова.
Конкурсыш ушнен
Тений «Мисс МарГУ-2024» конкурсыш ушнаш манын, 60 ӱдыр йодмашым пуэн, но тушеч улыжат 18 еҥым гына ойырымо. Нунын коклаш логалмыжым Дарья таче кугу кӱкшыт семын палемда.
– Шкенан факультетысе студактивым вуйлатыше Игорь Григорьевын темлымыж почеш, конкурсыш икымше гана ушнышым да отборым эртышым. Конкурслан кажне кечын ямдылалтына. Мыланна тӱрлӧ мастер-классым эртарат. Мутлан, кузе шкем калык коклаште, сценыште кучаш, кӱкшӧ таганан туфльо дене чаткан ошкыл колташ, шӱргыш макияжым чын пышташ туныктат. Мылам чыла тиде келша.
Конкурс марте жап шагал кодын гынат, утыжым ом тургыжлане. Тушто ме тӱрлӧ костюм дене дефилем, усталык номерым ончыктена, – мане тудо.
Талантан ӱдыр
Дарья изинек уста да чолга кушкын. Мураш да кушташ йӧратен. Кужмара селасе йоча сымыктыш школым «Хор мурымаш» да «Дирижёр» направленийла дене тунем пытарен. Чакмарий школыштат моло деч ойыртемалтын. Тӱрлӧ мероприятийыш, конференцийыш ушнен, волонтёр пашам чолган шуктен, тыгодым усталыкшымат вияҥден. Театр, куштымаш кружоклашке коштын, Даша сценкыште модмо мастарлыкшым нӧлтен, марла кушташ тунемын.
– Музыкым да ИЗО-м туныктышо Марина Григорьевна Ярикован темлымыж почеш, 9-ше классыште тунеммем годым Чакмарий школышто «Искра» волонтёр отрядым чумыренам, шкеак вуйлатенам. Эн ондак тушко кандаш тунемше ушнен ыле, вара эркын погынаш тӱҥальыч. Ме Марий Элын тӱрлӧ верыштыже лийынна, Йошкар-Олашке ятыр форумыш коштынна, СВО-што улшо салтак-влакланат полшенна. Тыгак Звенигово оласе 3-шо №-ан школышто волонтёр семын тыршенам, – каласыш ӱдыр.
Туныктышо тукым
Дарьян тукымыштыжо шуко туныктышо. Аваже Лариса Николаевна Чакмарий школышто руш йылме ден литературым 20 ий утла туныкта, тыгак директорын туныктымо паша шотышто алмаштышыже. Сандене ончыкыжым кӧ лийшашыжым Даша ончылгоч пален. Аважын шомакшым шотыш налын, руш йылмым да литературым туныктышо лияш ямдылалтеш.
Студент пагытшымат ӱдыр пайдалын эртара, тӱрлӧ могырым шкенжым терга, мастарлыкшым нӧлта. Тудо съёмкым ышташ моткоч йӧрата, видеомонтаж пашам сайын пала. Тыгак тӱрлӧ конкурсыш ушна, волонтёрлан тырша, «Йода» педагогический студотрядыш коштеш. Яра жапше годым флористлан пашам ышта.
– Туныктышо профессий кӱлешан. Но мый эше кинорежиссёр лияш шоненам. Ятыр съёмко пашам МарГУ-што аралалтеш. Кызытат тӱрлӧ пайрем годым видеом войзаш йодыт. Вузым тунем пытарымеке, кинорежиссёрлан тунемаш каяш шонем. Марий кундемна, мотор пӱртӱсна, шочмо калыкна, ойыртемалтше йӱлана нерген ик мотор фильмым сниматлаш кумыл уло.
А педагогический отрядыште опытым погаш, студент-влак дене пырля тӱрлӧ лагерьыш кошташ лиеш. Тений кеҥежым «Артек» йоча рӱдерыш вожатыйлан пашам ышташ каяш ямдылалтам.
Флорист лияш мыланем келша. Авам семынак пеледышым йӧратем. Флористике кажне кечын вияҥеш, сандене тиде направлений дене шуко курсым эрташ кӱлеш, – мане Дарья Иванова.
Тек Дарьян шонымашыже шукталтеш. Конкурсышто моло деч ойыртемалташ да сеҥыше радамыш лекташ тыланена.