2024 ийыште Йошкар-Олаште «Формирование комфортной городской среды» федеральный программе почеш тӧрлышаш вер-влак шотышто пале.
Эн шуко йӱк дене (6197) рӱдолаште «Тарханово» паркым уэмдаш палемдыме. Ты паркын кумдыкшо – 13 гектар. Тудо Транспортный да Молодёжный урем-влак ушнымаште верлана. Тушто тротуарым, проездым, транспортлан чарныме верым, каныме верлам ыштат. Варажым архитектур, волгалтарыме, ужартыме шотышто сомыл шукталтеш.
Кокымшо верыш Яналов уремысе кӱртньыгорно вокзал воктенысе сквер лектын. Тысе зданийлашке инвалид-влаклан йӧнан вер-шамычым ыштат, нуным волгалтарат, сылнештарат, каныме верым келыштарат.
Кумшо верыште – Марий паркым уэмдымаш. Тений кеҥежым чоҥалтшаш у паркым сылныракым ыштыме пашам умбакыже шуят.