8 январьыште Марий Элыште ий ӱмбалне фигурно мунчалтымаш спортын кечыжым палемденыт. Пайрем кечын Йошкар-Оласе «Дружба» стадионысо да «Марий Эл» ий полатлаште мероприятий-влак эртаралтыныт.
Марий Элысе ий ӱмбалне коньки дене мунчалтымаш спортшколын воспитанникше-шамыч тӱрлӧ номерым ончыктеныт, кумылан-влаклан мастер-класс лийын. Тылеч посна куд ияш марте ӱдыр-рвезе-шамыч ача-авашт дене пырля коньки дене мунчалтеныт.
Ты кечын оласе катоклаштат тӱрлӧ акций, мероприятий эртаралтыныт.
Палемдыман, У ий деч ончыч Йошкар-Олаште шочын-кушшо, кызыт Москошто фигурно мунчалтымаш спортышто кумдан палыме тренер Этери Тутберидзе дене шуаралтше Дарья Садкова Марий Элысе спортсмен-шамычлан мастер-классым ончыктен. Дарья – профессионал фигуристке. Тудын опытшо Марий Элысе ӱдыр-рвезе-влаклан моткоч пайдале лийын.
Марий Элысе Спорт министерствын сайтше гыч налме фото.