17 ноябрь – полиций участковый уполномоченный-влакын кечышт.
Шукерте огыл «Калык участковый–2024» конкурсын регионысо этапшым иктешленыт. Россий МВД-н Йошкар-Оласе управленийжын 3-шо №-ан полиций пӧлкажын участковый уполномоченныйже Ангелина Аксакова эн шуко йӱкым поген. Полиций старший лейтенант конкурсын финалыштыже Марий Элын чапшым арала.
Киров кундемын шочшыжо А.Аксакова шке илышыжым элгӧргӧ службо дене кылдаш Йошкар-Оласе строительный техникумышто «Правоохранительная деятельность» специальностьлан тунеммыж годым шонен пыштен. Да 2019 ийыште службыш толын. Пашам ышта, эше ты направлений денак кӱшыл шинчымашым налеш.
Калык дек лишкырак
Эрдене паша верыш толын, старший лейтенант А.Аксакова табельный оружийым налеш. Подразделений вуйлатыше дене планёркышто тӱрлӧ йодышым рашемдымеке, шке административный участкышкыже вашка. А туштыжо мо лийын кертеш, ончылгоч каласаш неле.
Ангелина шукыж годым йолын коштеш. Иктым вашлийын мутлана, весе дене мутым вашталта. Подъезд воктенысе теҥгылыште шинчыше-шамыч денат кутыралта. Тидыже икте-весе коклаште кылым ышташ полша да еҥ-влакым участковыйлан ӱшанаш тарата, тидын деч посна профессийыштына ок лий манын палемда А.Аксакова.
Закон йодмо почеш
Илышыште чонлан келшыше профессийым ойырен налмыж нерген Ангелина эше стажировкым эртымыж годымак умылен. Кеч участковый лияш куштылго огыл. А ӱдыр-ӱдырамашлан ты пашам ышташ эшеат неле.
– Службыш толмем почеш ик-кок ий путырак лӱдмашан ыле. Мутлан, пачерыш пурен шогалат, а тушто пӧръеҥ-влак кочывӱдым йӱын шинчылтыт. Погонан ӱдырым ужмеке, нунын вуйышкышт мо толын перна, мом ыштат, палаш ок лий. А ынде тунем шуынам, – манеш полиций пашаеҥ.
Эше участковый пеҥгыде лийшаш, кеч-могай неле ситуацийыште шкенжым кучен да кеч-кушто, кеч-кунам нелылык гыч лектын моштышаш. Ангелина, ӱдыръеҥ гынат, нигӧлан макым ок пу – изаж ден когыньыштым тыгай лияш ачашт туныктен.
Участковый – шуко жапым налше профессий. Яра жапем чылт уке, кочкаш да малаш гына кодеш манын шыргыжал пелешта Ангелина.
– Службо чыла шӧрыным авалта, пашаште веле огыл, илыш опытымат эре погыман, профессий дене илыман, манаш лиеш. Чоным пыштен от тырше гын, лектыш ок лий – вес пашам кычал веле. Нимом шылташ, пашам шуко вийым налеш, южгунам чыла кудалтен кайымат шуэш. Но кунам еҥ тый декет полышым йодын толеш але йыҥгырта, шке лушкыдылыкетым тудлан ончыктыман огыл. Вет тудо тыланет ӱшана да полшыметым вуча. Тӱҥжӧ – чылажымат закон почеш ышташ, – ойла А.Аксакова.
«Калык участковый–2024» конкурсын регионысо этапыштыже сеҥымылан Ангелина йывыртен. Тидыже куштылго огыл профессийыштыже тыршаш вийым эшеат ешарен, ончыкылык сеҥымашлан кумылаҥден.
Марий Элысе МВД-н пресс-службыжын пуымо фото-влак.