Светлана АЛЕКСЕЕВА, Медведево посёлко:
– Ялыште шочын-кушшо еҥ мландын, пӱртӱсын пайдаштым изинекак пала. Мыят – тыгак. Мландышке изи нӧшмым ӱден, кугу да таза саскам налаш тыршем. Садна Светлый посёлкышто, «Салют» товариществыште, верланен. Тушто шкаланна мо келша, чыла уло: олмапу, грушо, вишне, сливе, шемэҥыж да молат. Пакчасаскамат ситышын шындем, кевытыште нимомат налмаш уке.
Эше пеледышым моткоч йӧратем. Садым тӱзаташ пелашем полша: лӱҥгалтышым, беседкым, душым да молымат тудо шкеак ыштен. Сӧрастарыме годымат туддеч посна ок лий: то иктым пӱчкын пуаш йодам, то весым пеҥгыдын пералтен шындыктем.
Теат кудывечыдам, палисадникдам, садпакчадам моторын сӧрастареда гын, конкурсыш ушнаш ӱжына.
