Ӱдыр-влак мотор шӱргывылышышт, чатка капкылышт дене кеч-кӧнат кумылжым савырен кертыт. Но тиде моторлыклан кӧра мыняр пӱжвӱдым йоктараш логалеш? Мыняр жапым нуно тренажёр залыште эртарат? Тидын нерген шукыж годым огынат шоналте. Лач ик тыгай пример – Кужэҥер районын шочшыжо Полина Волкова.
Туризмлан кӧра
Полина изиж годсек спорт деке шӱмаҥше лийын. Куштылго атлетикыште, волейболышто, баскетболышто шкенжым терген. Но туризмыште поснак ойыртемалтын.
– Тӱҥалтыш школым Кужэҥер районысо Салтакъял селаште тунем пытаренам. Вара Кужэҥер посёлкысо 1-ше №-ан школыш вонченам да туштак 9-ше класс марте спортивный туризм дене заниматленам. Ты секцийыш коштмо почеш кумшо кечынак Йошкар-Ола воктеке ориентирований дене соревнованийыш наҥгаеныт. Вара моло таҥасымашлан ямдылаш тӱҥалыныт.
9-ше классыште спортивный туризм дене республикын сборный тренерже мыйым шекланен да кугурак кӱкшытан таҥасымашыш ушнаш ӱжын. Тыге 10-11-ше класслам Йошкар-Оласе 29-ше №-ан школышто МВД классыште тунемынам. Мыланна шуко маршироватлаш логалын, вет ме тӱрлӧ конкурсышто, парадыште выступатленна. Тылеч посна урок деч вара тренировкыш кошташ кӱлын. Шарнем, мӧҥгӧ 9 шагат кастене гына пӧртылам ыле. Но шкем пеҥгыдын кучымаш, чот тыршымаш мыланем спорт мастер лияш полшеныт. Тидлан нормативым 11-ше классыште шыжым Моско областьысе Цюрупы посёлкышто «Виталий Кондратьев лӱмеш шарнымаш кубок» всероссийский соревнованийыште шуктенам, – ойла П.Волкова.
Спорт шуко жапым да ӱнарым йодеш. Сандене ӱдыр, школым тунем пытарымек, профессиональный спорт деч кораҥын да шкенжым у шӧрыныштӧ кычалаш тӱҥалын.
Каҥгешташ веле огыл полша
Кызыт Полина Политехыште «Землеустройство и кадастры» направлений дене кумшо курсышто шинчымашым пога. Тунемме годымак ик спорт клубышто тренерлан пурен. Лӱмын курсым эртымек, групповой да индивидуальный тренировкым эртарен. Туштак каҥгешташ шонышо-влаклан онлайн-марафоным вӱдаш тӱҥалын. Кеч ынде тренерлан ок ыште, ты пашам кызытат шуя.
Самырык еҥ чоным лыпландарыше эше ик сомылым муын – ӱдыр-влаклан шинчавуным кушта да шинчавуным чиялта. Ондак йолташ-влаклан ыштен гын, кызыт шке студийжым куча. Тылеч посна ты шӧрыныштӧ тунемаш кумылан-влаклан курсым вӱда да соцкылыште вияҥаш полша.
Бодибилдинг
Полина кодшо ийын шыжым спортзалыш кошташ тӱҥалын. Ик тренировкышто Йошкар-Олаште бодибилдинг дене федерацийым почмо нерген уверым колын, шкенжым спортын у видыштыже тергаш кумылаҥын.
– Бодибилдинг дене соревнованийыш ончылгоч ямдылалтман, кочмым да тренировкым шотыш кондыман. А мый ты сомыллан куд тылзе ончыч гына пижынам, туге гынат сай лектышыш шуынам. Тыште мыланем кок тренер полшен. Кажне кечын кок тренировкыш коштынам, кочмемым тергенам, дефилелан тунемынам.
Тыге 22 мартыште икымше соревнованийыш ушненам. Тудо Шупашкар олаште эртен. Мый кок категорийыште участвоватленам: «Фитнес-эстетический дебют» (икымше гана таҥасыше-влак) да «Фитнес эстетический» (163-168 см кӱкшытан-влак коклаште). Тушто мыланна шке капкылнам ончыкташ, позироватлаш да дефилироватлаш кӱлын. Икымше категорийыште кокымшо верым налынам гын, кокымшышто нылымше лийынам. Тӱҥжӧ шке капкылым гына огыл, а шкенан лывыргылыкнам, чаткалыкнам ончыкташ, – мане П.Волкова.
Кызыт Полина икмыняр таҥасымашлан ямдылалтеш: 29 мартыште Йошкар-Олаште лиеш, 6 апрельыште – Нижний Новгородышто. Чолга ӱдырлан сеҥымашым тыланена.