Ирина Степанова, «Кугарня» газетын тӱҥ редакторжо:
– Шкемым чот кугу кулинарлан ом шотло, плита воктене шуко жап шогылташат ом йӧрате, но садак ешемым тамле да пайдале кочкыш дене сийлаш тыршем. Шонем, тиде ӱдырамашын ик эн тӱҥ пашаже.
Ме салат-влакым йӧратена. Ик гана ик тӱрлым ыштена, вес гана – весым. Утларакшым – каныш кечылаште. Мелнам кажне гаяк рушарнян кӱэштам гын, когыльым шуэнрак ыштем: иктаж пайремлан але амал лекмеке.
Тыгак мый кажне гана ӱстелым моторын сӧрастараш тыршем. Шонем, аппетитлан тидат сайын полша. Мотор чайгоркам шындылам, тарелке-влакымат чӱчкыдын вашталтылам. Ик гана ош наборым шындем гын, вес гана ӱстембалне йошкар атышӧр лиеш. Мотор салфетке-влакым оптем. Тыгак кухньо окнаштем нарынчалге тӱсан гирлянде теле гоч кеча. Эрдене да кастене тудым чӱктем, да моткоч уютно лиеш. Тыгак кухньышто арулык келша. Ом йӧрате, кунам ӱстембалне да кухньо гарнитур ӱмбалне, плита воктене уто арвер пӧрдалеш. Кажныжын шкенжын верже лийшаш. Ӱдыремымат тидланак туныктем.
Кульмакым (кӱжгырак изи мелнам) ышташ неле огыл. Тидлан изирак мискыш кок стакан леве кефирым, ик муным пыштем, изишак шинчалым да вич изи совла сакырложашым, ик изи совла содым ешарен, сайын пудыратем. Тушкак пел лимонын сокшым пунчалаш лиеш. Ынде тышке ложашым (кок стакан утла ложаш кӱлеш) эркын гына оптыман. Тыгодым сайын лугыман. Руаш нугыдо ӱмбал гай лийшаш. Тудо иктаж пел шагат шогышаш, каналтышаш.
Ты жапыште кок олмам эрыктыза, тёрко гоч колтыза да тушко изишак сакырложашым пыштен пудыратыза.
Кульмакым жаритлаш тӱҥалмеке, ырыктыме салмашке эн ондак руашым совла дене пыштыза, ӱмбакыже ты олмам изи совла дене вичкыжын йыгалтыза да адак руаш дене леведса. Кульмакым мелна семынак кок могыр гычшат жаритлыман. Тамле кочкыш ямде.