1945 ий 9 Май историйыште совет калыкын патырлыкше да геройлыкшо кече семын курымешлан шыҥдаралт кодын. А изиш варарак, 24 июньышто, икымше Сеҥымаш парад тиде подвигым ӱмыраҥден. Пытартыш кумло ийыште гына Москосо Йошкар площадьыште тӱмыр йӱк почеш военнослужащий-влак маршироватлат, миллионло россиян-влакын чоныштым тарватат. Тӱмырым перкалыше-влак коклаште Морко районын шочшыжо Дмитрий Колесников лийын.
Гармонь гыч тӱҥалын
Д.Колесников Морко район Чодыраялыште шочын-кушкын. Кумшо класс марте Арын кыдалаш школышто шинчымашым поген, вара республикысе Калыкле сымыктыш гимназийыш вончен.
– Икана ача-авам дене родо-шамыч дек унала миенна, тушто чӱчӱм изирак гармоньжо дене ик семым шокташ туныктен. Мыланем келшен, сандене ты семӱзгарым мыланем пӧлекленыт. Мӧҥгыштем шке семын шупшкедаш тӧченам, но шот лектын огыл. Кугурак лиймеке, школысо музыкальный кружокышто шуаралтынам. Тушто туныктышем мыланна баян да гармонь дене аккомпанироватлен. Вара ачам мыланем профессиональный у гармоньым налын пуэн. Сандене мом школышто тунемынам, мӧҥгыштӧ ушештаренам.
Калыкле сымыктыш гимназийыште 4-ше классыште тунеммем годым пучым пуалтыме классыш коштынам, 5-9-ше класслаште Владимир Павлович Пайгетов дене баян классыште шуаралтынам. Гимназий деч вара кугурак йолташ-влакын темлымышт почеш Москосо военный музыкальный училищыш каенам, – ойла Дмитрий.
Дирижёр сомыл
Москошто Д.Колесников гобой классыште тунемын. Кажне ийын тӱрлӧ фестивальыш коштын. Санкт-Петербург, Сочи, Тамбов, Хабаровск олалаште лийын. А икана Александр Васильевич Суворовын Альпы курык гоч вончымо кечыла-влак вашеш Швейцарийыш оркестр дене пырля миен толын.
– 2018-2023 ийлаште Моско олаште Россий Обороно министерствын военный институтыштыжо военный дирижёрлан тунем лектынам. Вара распределений почеш Тамбов олаш логалынам. 45-ше неле артиллерий бригадыште (Ракетный войскан да Сухопутный войскан артиллерий формированийже) дирижёрлан кокымшо ий пашам ыштем, – манеш Д.Колесников.
Дмитрий шке подразделенийжын боевой ямдылалтмашыжлан вуйын шога, тыгак чыла мероприятийым организоватла.
Пайрем кечын
Курсант-влак Сеҥымаш парадыште участвоватлен кертыт, но тидлан икымше тренировко гычак шкем сайын ончыктыман.
– Мый Кугу Ачамланде сарыште сеҥымашын 70-ше идалыкше лӱмеш Сеҥымаш парадыште икымше гана участвоватленам. Тунам икымше курсым тунем пытарем ыле. Декабрь гычак ямдылалтмаш тӱҥалын. Ондак еҥым погеныт, барабан дене шокташ туныктеныт. У ий деч вара кажне арнян кок шагат дене репетиций-влак эртеныт. Нуным видеош войзеныт да вара йоҥылышнам ончыктеныт. Тыгодым вургем формо гыч тӱҥалын строевой ямдылалтмаш марте эскереныт.
Сеҥымаш парад годым кажне гана тургыжланыме да кугешныме кумыл лектын, вет ме чыла военный подразделений-влаклан ритмым пуэнна. Южышт Россий Президент Владимир Путиным ужыныт гын, мый шекланен шуктен омыл. Кугу Ачамланде сарыште лийше кок кугезе кочам-влаклан тауштымо семын Сеҥымаш парадыш ушнем, – палдара дирижёр.
Дмитрий Москошто Сеҥымаш парадыште ныл гана лийын: кум ий почела тӱмырзӧ-влак ротышто, нылымше ийын — сводный орекст дене пырля. Тений тудо Тамбов олаште военный оркестр дене пырля Тамбов гарнизонысо войска-влакын торжественно эртымашыштышт тамбурмажорын сомылжым шукташ тӱҥалеш.
Пайрем дене, йолташ-влак!
Д.Колесниковын альбомжо гыч налме фото.