Таче Москваште «Красная площадь» книга фестиваль почылтын, тудо 20 июнь марте шуйна.
Пандемий лӱдыкшӧ уло гынат, организатор-влак пеш поян программым ямдыленыт — тӱрлӧ тематический площадкылаште 500 наре тӱрлӧ пашам эртарен колташ палемдыме. «Художественная литература», «Детская и учебная литература», «Нон-фикшн», «Регионы России», «Электронная книга», «Антикварная и букинистическая книга», «Москва – литературный мегаполис», «Отечественная история», «Музейная линия», «Литературная гостиная» да «Главная сцена» площадкыште тӱрлӧ мероприятий эрта.
Элнан рӱдӧ олашкыже шке книгаштым Российын 45 регионжо гыч намиеныт. Марий Элыште лукмо сатум Марий книга издательстве наҥгаен. Фестивальыш мийыше уна-влакым издательстве директор Юрий Соловьев шкеак да Марий Эл писатель ушемын председательже Светлана Архипова вашлийыт, пытартыш ийлаште лекше у книга-влак дене палдарат.
Тиде жапыштак Москваште Российысе тӱрлӧ калыкын литературжо дене палдарыме фестиваль эрта. Тушто «Кугарня» газет редакцийын пашаеҥже Надежда Моисеева пашам ышта.
Коронавирус шарлен кертме лӱдыкшӧ улмылан кӧра Книга фестивальыш маске да перчатке дене гына пуртат. Программым тиде сайтыште пален налаш лиеш. Но пураш ончылгоч тыште регистрироватлалтман, яра билетым налман.
Фестиваль 10:00 гыч 22:00 шагат марте пашам ышта; 18 июньышто — 10:00 гыч 23:00 марте. Ярмиҥгаште книгам 20% шулдынрак налаш лиеш.
Ушештарена: «Красная площадь» фестиваль 2015 ий гыч кажне ийын эрта.