23-25 октябрьыште Федераций Советыште Марий Эл Республикын кечыже-влак эртаралтыныт. Марий Элын делегацийжым Ю.Зайцев вуйлатен.
Кум кече жапыште ятыр кугу мероприятий лийын. Тыгак Марий Элын историйже да сеҥымашыже дене палдарыше ончер пашам ыштен. 25 октябрьыште Ю.Зайцев Российысе Парламентын кӱшыл палатыжын Председательже В.Матвиенком ты ончер дене палдарен, республикын кӱкшытшӧ, ончыкылан палемдыме пашаж нерген каласкален. В.Матвиенко промышленность аланыште Марий Элын кугу кӱкшытыш шумыжым палемден, тудо тыгак Марий Элыште эҥер туризмын волгыдо ончыкылыкшо нерген палемден коден. Кӱшыл палатын спикержылан республикысе вуз-влакын сеҥымашышт нергенат каласкаленыт.
Ю.Зайцев исполнительный кучемын федеральный органже-влакын вуйлатышышт, Федераций Совет комитет-влакын председательышт дене вашлийын, пӱсӧ йодыш-шамычым рашемден.
Мероприятийын ик эн тӱҥ событийжылан «Час субъекта Российской Федерации» шотлыман. Тушто регионын сеҥымашыже-влак дене палдареныт.
Республикым Вуйлатыше илышым саемдаш да экономикым вияҥдаш полшышо национальный проект ден кугыжаныш программе-влакым илышыш шыҥдарыме нерген ойлен.
– Марий Элыште 40 млрд теҥгеаш 190 инвестиционный проект илышыш шыҥдаралтеш. Республикыште промышленно-производственный сынан посна экономический зоным ышташ ямдылалтыт. IT-сфер вияҥеш. Национальный проект-шамыч полшымо дене 70 наре социально-кӱлешан объектым чоҥымо да уэмдыме. «Сай качестван лӱдыкшыдымӧ корно» национальный проект почеш пашам ыштыме шотышто Марий Эл кумшо ий ончыл верым налеш, – ойлен Ю.Зайцев.
Вуйлатышын палемдымыж почеш, Федераций Совет полшымо дене Моско ден Санкт-Петербург коклаште авиасообщений уэш пашам ышташ тӱҥалын, медучреждений ден ЖКХ объект-влак чоҥалтыныт, моло кугу паша ышталтын.
Ю.Зайцевын палемдыме эше ик пӱсӧ йодыш – социальный инфраструктурым чотрак вияҥден колтыман. Йошкар-Олаште да Волжскышто общеобразовательный тӧнежлаште вер-влак огыт сите. Онкологический диспансерым чоҥыман. Тыгак спорт, соцобслуживаний объект-влакым чоҥымаште федеральный полыш моткоч кӱлешан, коммунальный инфраструктур объект-влакым уэмдыман.
Экономике вияҥеш
Ю.Зайцев Экономический политике шотышто комитетым вуйлатыше А.Кутепов денат вашлийын. Вуйлатыше корным чоҥымо, туризм да промышленность аланлаште кугу кӱкшытыш шумым палемден.
Марий Элысе Правительстве Председательын алмаштышыже Д.Троцкий докладым ыштен. Тудо пытартыш ийлаште республикыште ялозанлык да промышленность аланлаште производство кугеммым палемден. Кызыт Марий Эл холодильный оборудованийым, кӱртньӧ омсам, электроустановочный изделийым ыштен лукмаште Российыште ончыл верым налеш. Кочкыш сатум ыштен лукмаштат Марий Эл кугу кӱкшытыш шуын. Экономике отрасльын продукцийже 86 элыш ужалалтеш, сатум Российын 70 регионышкыжо шупшыктат.
ЖКХ да инженерный инфраструктур
Марий Элын коммунальный да инженерный инфраструктуржым вияҥдыме йодышым Ю.Зайцев Федераций Советын Федеративный устройство, региональный политике, верысе самоуправлений да Йӱдвелысе паша шотышто комитетшын вуйлатышыже А.Шевченко да тудын икымше алмаштышыже В.Городецкий дене вашлийме годым нӧлталын.
Ю.Зайцевын ойлымыж почеш, Федераций Советын 2018 ийысе пунчалжын палемдыме пунктшо-влак почеш 90 процент наре мероприятий ышталтын, моло сомыл шуктымым вуйлатыше шкеак терга. Тений тыгай пунчалыш калыкым тургыжландарыше моло йодышымат пуртыман, поснак – ЖКХ нерген йодыш-влакым.
Заседанийыште Йошкар-Олаште эҥер серым тӱзатыме, водоснабжений да водоотведений объект-влакым чоҥымо, шуко шочшан еш-влаклан мландым ойырымо, шуко пачашан пӧртлаште лифтым вашталтыме нергенат ойленыт.
Ялозанлык, спорт, туризм
Марий Эл Правительстве Председательын алмаштышыже А.Сальников Федераций Советын Аграрно-продовольственный политике да пӱртӱс дене пайдаланыме шотышто комитетшын заседанийыштыже лийын. Тушто республикысе агропромышленный комплексым вияҥдыме йодыш-влакым онченыт.
2018-2022 ийлаште Марий Элыште ялозанлык сатум 1,3 пачаш шукырак ыштен налме.
Марий Эл Правительстве Председательын икымше алмаштышыже Е.Кузьмин Федераций Советын Социальный политике шотышто комитетшын заседанийыштыже лийын. Тушто республикыште социальный сфер, спорт да туризмым вияҥдыме нерген ойленыт.
Марий Элысе Правительстве Председательын икымше алмаштышыже М.Васютин Федераций Советын Науко, образований да тӱвыра комитетшын заседанийыштыже лийын. Тушто Марий Элыште образований да тӱвыра аланыште кызытсе инфраструктурым ыштыме нерген ойленыт.