Марий Элым Вуйлатыше Ю.Зайцев Москошто пӱртӱс дене пайдаланыме сферыште тергыше службым вуйлатыше С.Радионова дене вашлийын.
Нуно «Экологий» нацпроетын «Юлым тазаҥдымаш» федеральный проектше почеш шукталтше сомылым каҥашеныт. Юрий Зайцевын мутшо почеш, 2023 ийыште республикыштына 4 очистной сооруженийым (Килемар, Марий Турек, Параньга районлаште да Йошкар-Олаште) ачалыме.
Очистной сооруженийым пужен ыштыме пашам эше 2020 ийыште тӱҥалме. Тудым шукташ федеральный бюджет гыч 1,5 млрд утла теҥгем колтымо.
Пашам график деч ончылгоч шуктымо. Денитрификаций технологиян да органический лавырам эрыктыше объектын икымше линийжым уэмдыме. Ты объектын куатше – суткаште 60,8 тӱжем кубометр.
Кызыт Марий Эл Правительствыште Йошкар-Олаште очистной сооруженийым олмыктымо пашан кокымшо йыжыҥже нерген йодыш каҥашалтеш.