27 майыште МарГУ-што «Лига Знаний: школы и колледжи» интеллектуальный турнирын регионысо йыжыҥже эртаралтын.
Российысе Просвещений министерствын полшымыж дене тений тыгай турнирым 24 мартыште эртараш тӱҥалме. Тушко 89 регион гыч 400 тӱжем утла участник ушна. Икымше йыжыҥ тунемме организацийлаште лийын. Тушто шкетын да команде дене таҥасеныт.
Марий Элыште интеллектуальный модмашын регионысо йыжыҥыштыже лу виян команде таҥасен. Сеҥышыш Йошкар-Оласе 11-ше №-ан лицейын командыже лектын, тудо Москошко турнирын финалышкыже кая. Виян команде шотеш тыгак Йошкар-Оласе экономико-правовой гимназийым да Козьмодемьянскысе 1-ше №-ан школым шотлымо.
Регионысо йыжыҥыште сеҥыше-влакым Марий Элысе образований да науко министрын алмаштышыже Валентина Гаврилова саламлен.