Марий Элын самырык инспекторжо-влак Российысе «Лӱдыкшыдымылык колесо» конкурсышто таҥасеныт. Конкурсым Краснодар кундемысе «Смена» йоча рӱдерыште иктешленыт. Тушко элнан 89 регионжо гыч 10-12 ияш ӱдыр-рвезе-влак ушненыт.
Марий Элын чапшым Волжский районысо Памар кыдалаш школын командыже арален. Майыште конкурсын регионысо йыжыҥже эртен. Ты команде тунам сеҥышыш лектын. Конкурсышто тунемше-влак корно правилым палымыштым, теорийыште да практикыште икымше полышым кузе пуаш кӱлмым, велосипед дене сайын кудалышт моштымым ончыктеныт. Команде-шамыч коклаште Марий Эл 22-шо вер дене палемдалтын, а велосипед дене кудалыштме йыжыҥыште нуно лу эн сайын кудалыштше-влак коклашке логалыныт.