26 апрельыште Марий талешке кечын Йошкар-Олаште ятыр мероприятий эртаралтын. Иктыже – «Благовещенский башне» выставке-рӱдерыште «Поликультурная карта Республики Марий Эл» проектын черетан выставкыже. Тудо Морко районлан пӧлеклалтын.
Т.Евсеев лӱмеш Национальный музей Марий Элын тӱвыра, печать да калык-влакын пашашт шотышто министерствыж дене пырля тений «Поликультурная карта Республикики Марий Эл» проектым илышыш пурташ тӱҥалын. Тудо Марий Эллан 100 ий теме вашеш кажне районышто илыше калык-влакын тӱвырашт, йӱлашт, историйышт, пӱртӱс поянлыкышт да моло ойыртемалтше пашаж дене палдара. Тылеч ончыч Козьмодемьянск олан да Курыкмарий районын выставкылашт лийыныт.
Выставке залыште «Морко район» презентацийым ончаш темленыт. Тыгак «Морко кундем», «Рвезылык» ансамбль-влак, районын визит картычкыже семын, пайрем шӱлышым пуртеныт. Карина Борисова «Морко кундемем» почеламутым сайын лудын. Выставкышке Морко посёлкысо Янтемир лӱмеш тоштер, Чавайнурысо С.Чавайн лӱмеш музей-комплекс, Унчо этно-культурный комплекс ойыртемалтше экспонат-влакым конденыт. Морко кундем кидмастар-влакын пашаштлан поян, марий тӱран чиемыштым, йӱлаштым тукым гыч тукымыш кучыктат. Йошкар-Олаште илыше-влак Морко кундемын тӱвыра поянлыкшым ик тылзе ончен кертыт. Нунын деч эстафетым Волжский ола ден район налеш.