Аламлан огыл Морко мландым,
«Талант памаш» манын лӱмдат.
Ятыр лӱмлӧ, уста еҥже,
Шочын-кушкын лач туштак…
Тыгай почеламут корныла дене Морко кундемысе этнокультур предметлам туныктышо-влакемым мокталтен колтынем. Шочмо йылмым вияҥден толмаште нунын надырышт каласен пытараш лийдыме.
Кажне туныктымо идалыкыште самырык тукымым шинчымаш кугорно дене ончыко вӱдымӧ сомыл деч посна нуно эше этнокультур предметлам туныктымашке ойыртемалтше усталык шӱлышым пыштен шогымышт дене икте-весыштым палдарат. Саман вашталт толмо дене тӱрлӧ чарак тидлан лектеда гынат, туныктышына-влак вуйым огыт саке. Пандемий деч ончыч ме кажне школышко паша надырнам ончыкташ лектын коштынна гын, пандемий жапыште ЗУМ йӧн дене методушем погын-влакым эртарена. Тидыже туныктышем-шамычын илышын керек-могай вашталтышыжлан ямде улмышт, пашам кыртмен ыштымышт да илыш дене тӧр кайымышт нерген ойла. Могай гына таҥасымашке нуно шке тунемшыштым огыт лук, кушто-гына школыштын, районыштын чапшым огыт арале – чыла вере ончылно улыт.
Шукерте огыл республикыште эртаралтше «МУНЛО» уш-акыл марафон ты шонымашым уэш пеҥгыдемдыш. Куд еҥан команде илышын чыла шӧрынжӧ дене кылдалтше йодышлан вашмутым верештеш. Марий калыкын вияҥын толмо корныжо, йылмыже да сылнымутшо, тӱвыра ден сымыктышыже – чылажат «МУНЛО» уш-акыл марафонышто шке вержым айла. Ты ийын Морко районын «Чолпан» командыже 1-ше верым нале.
Мый, Морко кундемысе этнокультур предметлам туныктышо-влакын методушем вуйлатышышт семын, «Чолпан» командын чолга участникше-влаклан вуем савем. А Морко кундемысе моло марий йылме туныктышо-влакын ты команде верч тургыжланымыштлан таум каласем. Вет ме, Морко районысо этнокультур туныктышо-влак, чыланат ик еш семын келшен пашам ыштена. Лач тӱшкан да ик ой дене тыршымашна шочмо йылмынан чапшым кӱшнӧ кучаш полша!
Елена Григорьева, Морко районысо этнокультур предметлам туныктышо-влакын методушем вуйлатышышт.
Снимкыште: Республикыште эртыше «МУНЛО» уш-акыл марафонышто сеҥыше «Чолпан» команде.