Военный формым чийыше-шамычым вашлиятат, шӱм-чонышто
кугешнымаш кумыл ылыжеш. Мутат уке, формо пӧръеҥым сӧрастара. Но
тыгай форман лияш могай нелылык гоч эрташ, мыняр пӱжвӱдым йоктараш
кӱлеш манмым шукыж годым ме огына шоналте. Морко посёлкышто
шочын-кушшо Сергей Васильев тидым сайын пала. Тудо Санкт-
Петербургышто Военно-морской инженерный институтышто тунемеш.
Инженер лияш шонен
Сергей футболым изинек йӧратен, йолташыже-влак дене пырля мечым
чумен. Йочаж годсек эше ик йӧратыме сомылжо – конструкторым погаш.
Мӧҥгыштыжӧ изирак коллекцийым чумырен шуктен. «Ача-авам у
конструкторым налын пуатат, иканаште погаш пижам ыле. Вара ик жап гыч
тудым шалатем да йӧршеш весым угыч погем. Кушкын шуамат,
инженер лиям манын шоненам», – ойла тудо.
С.Васильев 7-ше класс марте посёлкысо школышто тунемын. Тудлан точный
манме науко-влак келшеныт. Нуным келгынрак тунемаш шонен, Кокласола
лицейыш физмат классыш куснен. «9-ше классыште тунеммем годым
военный вузыш тунемаш пураш пеҥгыдын шонен пыштенам да ямдылалташ
тӱҥалынам, – каласкала рвезе. –Тыгай вузлаште тунемше йолташем-влак
лийыныт, нуно мыланем мо-кузежым умылтареныт: могай предмет дене
ЕГЭ-м кучыман, тунемаш пурымо годым могай экзамен-влак лийыт».
Питерым ойырен налын
С.Васильев Санкт-Петербургысо Военно-морской институтыш тунемаш пураш шонен. 11-ше классыште тунеммыж годым теле каникул деч вара военкоматыш кӱлеш документым пуэн да вашмутым вучаш тӱҥалын.
Шошым рвезылан вашештеныт: тудым 1 июльышто Санкт-Петербургышто
экзаменым сдатлаш вучат. Тунемаш пурымо годым физподготовкым
тергеныт: подтягиванийым ышташ, 100 метрым да 3 меҥгым куржаш кӱлын.
Профотбор да психологический тест-влакым, тыгак руш йылме, профильный
математике да физике дене ЕГЭ-м сдатлен.
– Тунам уло июль мучко училищыште экзаменым сдатленна. Тылзе мучаште мемнам погеныт да тунемаш пурен кертше-влакын спискыштым лудыныт, – каласкала С.Васильев. – Тиде татым кызытат сайын шарнем, тунам пуйто уло тӱня чарнен шогалын. Пиалешем, тиде тургыжланымаш кужун шуйнен огыл – мыйын фамилием ик эн ончыч ойленыт.
Отличник
Институтышто офицерымат (5 ий тунемман), мичман-влакымат (2 ий да 10
тылзе тунемман) ямдылат. Сергей электроэнергетический установко-влак
факультетыште кумшо курсышо тунемеш, «Эксплуатация
электроэнергетических систем корабля» специальностьым налаш
ямдылалтеш. Тунем пытарымеке, лейтенант званийым пуат.
– Икымше да кокымшо курслаште тыглай вуз семынак туныктат. Кумшо
курс гыч специальностьлан келшыше программе тӱҥалын. Тыршен тунемат
гын, чылажат куштылгын чучеш. Школышто «нылытанлан» да «визытанлан»
тунемынам, институтышто отличник улам. Тыште тунемаш иктаж-могай
ойыртемалтше айдеме лияш ок кӱл. Тӱҥжӧ – сайын тунемаш, дисциплиным
кучаш, – манеш рвезе.
Кажне тунемме ийын практике эртаралтеш. Тений августышто Сергей
Североморск олаште боевой корабльыште практикым эртен.
Лишыл еҥ-влак полшат
Санкт-Петербург рвезылан иканаште келшен. Олан архитектуржо, моло
мотор верже тудын чонжым савыреныт. Ончыч Сергей волгыдо йӱд-влаклан
ӧрын ыле, но тудлан вашке тунем шуын.
Неле, чонлан йокрок годым С.Васильевлан ешыже поро шомак дене полша,
кумылжым нӧлта. Тиде олаштак Сергейын йӧратыме таҥже ила, тудо
йокрокланаш ок пу.
– Военный лияш але гражданский профессийыште пашам ышташ – кажне айдеме шке ойыра. Тиде корныш шогалмемлан ик ганат ӧкынен омыл, профессием утларак да утларак веле сымыстара. Кажнылан илышыште чын корным ойыраш тыланем, – манеш рвезе.