15 февральыште Байкал ерысе Ольхон отрошто «Olkhon Ice Fest» ий скульптур тӱнямбал фестиваль кудымшо гана почылтеш.
Тушто шке мастарлыкыштым Россий, Китай да Беларусь Республик гыч толшо командевлак ончыктат. Скульптор-влак Байкал ерын историйже, Прибайкальын мифше ден легендыж негызеш ий композицийвлакым ышташ тӱҥалыт.
Фестивальыште Российын чапшым аралыше-влак коклаште иктыже – Морко марий эрге Денис Афанасьев. Тудо палыме скульптор, спидкарвинг дене тӱнямбал чемпион Владимир Алмановын тунемшыже. В.Алманов ойла:
– Йолташем-влак фестивальыш Богородск оласе политехнический техникумын кок уста студентшым ойыраш темленыт. Тыгай кугу симпозиумыш марий эргым колташак тыршенам. Фестивальыште участник-влак икмыняр номинацийыште мастарлыкыштым ончыктат. Ий пластике направленийыште посна номинаций лиеш. Мастар-влак серыште кылмыше толкын гыч скульптурым ыштат.
Каласыман, «Olkhon Ice Fest» проект тӱвыра инициативе Президент фондын грантшым сеҥен налын. Тушко Российысе веле огыл, тыгак Беларусь Республикысе, Китайысе, Францийысе художественный тӧнеж-влакын студентышт погыненыт. Фестиваль годым уста ӱдыр-рвезевлак арня тунемыт. Вара команде-влак ий композицийым ыштат. Российын чапшым Денис Афанасьев ден Пётр Зуб аралаш тӱҥалыт. Фестиваль годым йомакысе гай ий ола шочеш.
Симпозиумын программыже пеш чапле. Тудо Байкал ерын «шӱмыштыжӧ» – сылне Ольхон отрошто – эрта.
Денислан сеҥымашым тыланена.
В.Алмановын колтымо фотожо.