Тачысе саманыште калыкын праваже верч профсоюз пеҥгыдын шога. Тидыже поснак туныктымо аланысе профсоюз ушемын тӱвыргӧ паша лектышыж гоч раш палдырна.
Теве у тунемме идалык тӱҥале веле, ик тылзе жапыште моткоч шуко паша ышталте. Мыняр туныктышо, школ пашаеҥ у тунемме идалыкым тӱҥалме нерген чумыр республикыштына электрон иктешлымашлан пеш кугу тӱткыш ойыралте. 22 сентябрьыште Морко районысо чыла школлан профсоюз ушем вуйлатыше-влак туныктымо пӧлкаш семинарыш чумыргышна. Тудын кышкарыштыже Морко районысо туныктымо пӧлка вуйлатыше В.В.Кирчанов у вашталтыш дене палдарыш. Районышто туныктымо паша шотышто мо ышталтме нерген шонымаш кажне профсоюз ушем вуйлатышылан кӱлешан. Умбакыже мутым Морко районышто туныктымо аланысе профсоюз толкыным вуйлатыше В.С.Фёдоров нале. Тудо кодшо тунемме идалыкым иктешлыш, у паша радамым рашемдыш.
А профсоюз таҥасымаш нерген поснак шуко ойлаш лиеш. Теве Чумыр тунемме идалык мучко школ пашаеҥ-влаклан пеш шуко таҥасымаш эртаралтеш. Кажне ийын сентябрьыште Тазалык спартакиаде тӱҥалтышым налеш. Куштылго атлетике дене таҥасымаш 24 сентябрьыште лие. 11 школ гыч 53 спортсмен ушнен. Ӱдырамаш-влак ик меҥгыш, пӧръеҥ-влак кок меҥгыш куржыныт. Ӱдырамаш коклаште сеҥышыш Кожлаер школын чолга туныктышыжо А.В.Иванова лектын, а пӧръеҥ коклаште ты школынак физкультурым туныктышо да профсоюз ушем вуйлатышыже В.В.Степанов лийын.
Кыдалаш школ-влакын командышт коклаште Арын школын командыже сеҥышыш лектын. 2-шо вер дене Кокласола лицей палемдалтын. 3-шо верым Морко 1-ше школ налын. Тыгак Морко 6-шо, 2-шо да Нужключ школ-влак чолгалыкым ончыктеныт. А тӱҥ школ-влак коклаште Кожлаер школ сеҥыше лийын. 2-шо вер дене Шордӱр, 3-шо вер дене Кумыжъял палемдалтыныт. Поснак кугу писылыкым Шӱргыял ден Купсола школын командышт ончыктен.
А 27 сентябрьыште кажне школын профсоюз ушемже Россий мучко эртаралтше Профсоюз диктантышке ушныш. Вет лач ты кечын чыла туныктымо аланысе пашаеҥ-влак профсоюз ушемын шочмо кечыжым палемдат.
Профсоюз шке пашаеҥжын чапшым керек-кунамат арален шога. Тидланже Морко кундемыштына поснак кугу тӱткыш ойыралтеш. Чыла школласе профсоюз ушем вуйлатыше-влак лӱм дене мый В.С.Фёдоровлан пеш кугу таум каласем. Ты чолга айдеме мемнам ончыко вӱда.
Елена Григорьева, Морко районысо туныктымо аланысе профсоюз ушемын президиумжын еҥже.
Снимкыште: Морко районышто эртаралтше Тазалык спартакиадын чолга спортсменышт.