Валерия Григорьева Морко район Кокласола лицейыште 11-ше классыште тунемеш. Чолга ӱдыр ятыр мероприятийыште шкенжым терга, тӱрлӧ конкурсышто ончыл верыш лектеш. Тений сентябрьыште Валерия «Микрогранты» Российысе молодёжный проект конкурсышто сеҥен. Ӱдырын проектше «Летняя двухдневная школа волонтёров Победы-2023» маналтеш.
Валерия Морко район Купсола ял гыч. Ӱдыр изинек ответственный кушкын, ача-аважат тудым шкалан шке ӱшанаш туныктеныт, тыгодым тӱҥалме пашаште эре полшеныт да икшывыштлан ӱшанле эҥертыш лийыныт.
Кокласола лицейыш В.Григорьева икымше класс гычак кошташ тӱҥалын.
– Индешымше класс деч вара кадет классыште тунемаш тӱҥалаш шонен пыштенам. Ача-авам тореш лийын огытыл. Шочмо-кушмо мландем йӧратем, тудын дене кугешнем да элем аралынем, садланак кадет классым ойырен налынам. Лицейыште туныктышо-влак ача-ава гаяк поро, шке пашаштым сайын палыше, кажне тунемшым шижын моштышо улыт. Пырля тунемме йолташем-влак денат келшен илена, ваш эре полшена. Обществознаний – эн йӧратыме предметем. Тиде урокым Валентина Николаевна Васильева вӱда, тудо кажне икшыве дене кылым муын мошта, йочам шижеш да тунемаш кумылым эшеат луктеш. Лицейыште урок-влак пытымеке, ме куд шагат кас марте канена. Вара уэш тунемме пашалан пижына: Валентина Николаевна дене пырля конкурслан ямдылалтына, тӱрлӧ заданийым ыштена, – каласкала ӱдыр.
Ӱмаште Валерия «Юнармия» детско-юношеский военно-патриотический общественный движенийыш ушнен. Основы военной службы предметым туныктышыжо Ю.Н.Романов дене пырля районысо да республикысе патриотический сынан тӱрлӧ мероприятийыш, акцийыш ушнат. ОБЖ-м туныктышо В.А.Подбойкин дене пырля шымлыме пашам возат да районыштат, республикыштат сеҥыше-влак радамыш лектыт.
Кадет классыште тунемше кажне ӱдыр-рвезе юнармеец-влакын «Морко шӱшпык» волонтёр отрядышкышт коштеш. Ятыр мероприятийыште участвоватлат: «Курымашлык полк», «Обелиск дек корно», «Шарнымаш сорта» да молат.
– Ты отрядна дене волонтёр пашам шуктена. «Морко шӱшпык» отрядыш коштмо дене ме порырак лияш, еҥ-влаклан утларак полшаш, шочмо мландым эшеат чот йӧраташ да аралаш тунемынна. «Микрогранты» конкурсышто сеҥымемлан Валентина Николаевналан кугу таум каласынем. Проектым ямдылымем годым тудо мыланем пеш полшен. Конкурсыш ушнышо ныл тӱжем наре проект коклаште сеҥышыш лекташ – кугу пиал. Проектлан келшышын, район гыч волонтёр-влакым чумырен, кеҥежым кок кечаш слётым эртараш шонена. Слёт годым ме проектым возаш тӱҥалына, Морко район гыч Совет Ушемын Геройжо-влак Василий Иванович Соловьёв ден Зосим Алексеевич Красновын шочмо верышкышт миен толаш шонена, – ойла ӱдыр.
Валерия кушташ йӧрата. Школ деч вара тудо Кугу Шале ялысе клубыш кушташ коштеш, сылнын мура. Усталыкшым тӱрлӧ конкурсышто терга, тиде аланыште сеҥымашыжеат шагал огыл. Каныш кечылажым ешыж дене пырля эртара, пӱртӱсыштӧ лияш йӧрата. 11-ше класс деч вара военный направлений денак тунемаш пурынеже. Тидлан кызытак ямдылалтеш.
В.Григорьеван альбомжо гыч налме фото.